Украина президенти Пётр Порошенко Шарқий ҳамкорликнинг Ригадаги саммити чоғида Германия канцлери Ангела Меркель ва Франция президенти Франсуа Олланд билан учрашди. Шундан сўнг, News.Liga.net’нинг қайд этишича, Порошенко ва Кэмерон ўртасида учрашув бўлиб ўтган.
Порошенко Меркель ва Олланд билан Донбассдаги воқеалар ривожини муҳокама қилди, суҳбатдошлар Минск келишувларининг барча бандлари, айниқса, ўт очишни тўхтатиш, оғир қуролларни ортга қайтариш ва гаровдагиларнинг барчасини озод қилиш кабилар бажарилиши лозимлигини таъкидлашди.
Қўшимча қилишларича, Порошенко, Меркель ва Олланд июнь ойида Мюнхенда бўлиб ўтадиган «Катта еттилик» мамлакатлари етакчилари ўртасидаги учрашув арафасида «ҳаракатларни мувофиқлаштириб олишган».
Кэмерон билан учрашув давомида Порошенко суҳбатдошига Минск келишувларининг бажарилиши ва Донбассдаги сўнгги ҳодисалар ҳақида, хусусан, россиялик икки ҳарбий хизматчи қўлга олингани ҳақида ахборот берди.
Томонлар шунингдек Донбассда тинчликпарвар кучлар миссиясини жойлаштириш имкониятини ҳам муҳокама қилишди. Кэмерон Украина бундан буён ҳам Буюк Британия томонидан кўрсатиладиган ёрдамга умид қилиши мумкинлигини таъкидлади.
Изоҳ (0)