Hindiston janubidagi jazirama natijasida 30dan ortiq kishi halok bo‘ldi

Hindiston janubida kuzatilayotgan favqulodda jazirama sabab kamida 31 kishi vafot etdi. Bu haqda “RIA Novosti” xabar bermoqda.

Telangana shtatida va Andxra-Pradesh shtati sohillarida yuqori darajadagi harorat saqlanib turibdi. Rasmiy ma’lumotlarga ko‘ra, Telangananing Nizomobod tumani hududida havo harorati 46 darajagacha isigan bo‘lib, natijada 12 kishi halok bo‘lgan.

Norasmiy hisob-kitoblarga ko‘ra, qurbonlar soni 50 nafarga yaqinlashib qolgan. Andxra-Pradesh shtatida 16 kishi halok bo‘lgani aytilmoqda. Jaziramadan eng ko‘p Shrikakulam va Vizianagaram tumanlari zarar ko‘rgan.

Shtat poytaxti Haydarobodda havo harorati 43 darajagacha isigan bo‘lsa, mavsum rekordi Vijayavada aeroporti va Nandigama shahrida qayd etilgan – bu yerda havo harorati 44 darajagacha ko‘tarilgan.

“Issiq havo sharoiti 23-mayga qadar saqlanib turadi”, - deya ma’lum qildi Haydarobod meteorologiya departamenti. Qayd etish joiz, yilning bu davrida mintaqada havo harorati 40 darajadan yuqori bo‘lishi odatiy holdir.