Ҳиндистон жанубидаги жазирама натижасида 30дан ортиқ киши ҳалок бўлди
Ҳиндистон жанубида кузатилаётган фавқулодда жазирама сабаб камида 31 киши вафот этди. Бу ҳақда «РИА Новости» хабар бермоқда.
Телангана штатида ва Андхра-Прадеш штати соҳилларида юқори даражадаги ҳарорат сақланиб турибди. Расмий маълумотларга кўра, Телангананинг Низомобод тумани ҳудудида ҳаво ҳарорати 46 даражагача исиган бўлиб, натижада 12 киши ҳалок бўлган.
Норасмий ҳисоб-китобларга кўра, қурбонлар сони 50 нафарга яқинлашиб қолган. Андхра-Прадеш штатида 16 киши ҳалок бўлгани айтилмоқда. Жазирамадан энг кўп Шрикакулам ва Визианагарам туманлари зарар кўрган.
Штат пойтахти Ҳайдарободда ҳаво ҳарорати 43 даражагача исиган бўлса, мавсум рекорди Вижаявада аэропорти ва Нандигама шаҳрида қайд этилган – бу ерда ҳаво ҳарорати 44 даражагача кўтарилган.
«Иссиқ ҳаво шароити 23 майга қадар сақланиб туради», - дея маълум қилди Ҳайдаробод метеорология департаменти. Қайд этиш жоиз, йилнинг бу даврида минтақада ҳаво ҳарорати 40 даражадан юқори бўлиши одатий ҳолдир.
