2015-yil 19-may kuni O‘zbekiston Respublikasi va Ozarbayjon Respublikasi Hukumatlari o‘rtasida Favqulodda vaziyatlar oldini olish hamda bartaraf etish to‘g‘risida o‘zaro bitim imzolandi, deb xabar qiladi “Review.uz”.
Hujjatga O‘zbekiston tomonidan Favqulodda vaziyatlar vaziri Tursinxon Xudoyberganov, Ozarbayjon tomonidan esa FVV rahbari Kamoliddin Geydarov imzo chekdi.
Kamoliddin Geydarov bu hujjat ikki tomon uchun hamkorlikning yangi eshiklarini ochishi, texnogen va tabiiy ofatlar oldini olishda tajriba almashish imkonini berishini aytib o‘tdi.
“Ozarbayjon favqulodda vaziyatlar vazirligi O‘zbekiston FVVdan ancha yosh. Biz faoliyatimizni boshlagan ilk davrlarimizdanoq o‘zbekistonlik hamkasblarimiz bilan hamkorlik qildik. O‘zbekiston favqulodda vaziyatlar vazirining Ozarbayjonga ilk tashrifi ikki yil oldin sodir bo‘lgandi”, — dedi Geydarov.
“Bugun imzolangan kelishuv fuqarolar hayotini qutqarish va favqulodda holatlar oldini olish kabi muhim bo‘lgan sohada bizning hamkorligimizga yangi turtki beradi. Uning bu sohadagi asosiy yo‘nalishlaridan biri tadqiqotchilik faoliyati bo‘ladi”, — deb qo‘shimcha qildi Ozarbayjon FVV rahbari.
Izoh (0)