Toshkentning Muqimiy ko‘chasiga Siemens svetoforlari o‘rnatildi
Xabaringiz bor, 2014-yil kuzidan buyon Toshkentda tashqi kuzatuv kameralari o‘rnatish ishlari olib borilyapti. Bu kameralardan shahardagi avtomobil va piyodalar oqimini boshqarish, qoidabuzarliklarning oldini olish, qoidabuzarlarni esa jazolashda foydalaniladi.
Afsuski, hozir ko‘chalarimizdagi harakatni tartibli, deb bo‘lmaydi. KHAY/Bodomzor yo‘li chorrahasida bir soat ichida 85 ta qoidabuzarlik, Yunusobod tuman hokimiyati oldidagi piyodalar o‘tish yo‘lida bir soat ichida 600 ga yaqin qoidabuzarlik haqida xabar bergan edik. Bundan tashqari, qoidalarga rioya qilmaslik oqibatida shahrimizda har kuni ayanchli yo‘l-transport halokatlari bo‘lmoqda.
O‘rnatilayotgan kameralar ana shunday aynchli holatlarning oldini olib, yo‘l harakati ishtirokchilari sog‘lig‘i va mulkini saqlab qolishga, davlatimiz byudjetini to‘ldirishga yordam beradi, degan umiddamiz.
Toshkentning Muqimiy va Akramxo‘jayev ko‘chalari chorrahasida tashqi kuzatuv kameralarini o‘rnatish ishlari yakuniga yetay deb qoldi. “Daryo” muxbiri tomonidan tayyorlangan fotoreportajni e’tiboringizga havola etamiz.
Eslatib o‘tamiz, avtomobillar harakatini boshqarish, tashqi kuzatuv kameralarini o‘rnatish ishlari Shveysariyaning AGT International kompaniyasi tomonidan olib borilayotgani haqida xabar bergan edik. Muqimiy ko‘chasida o‘rnatilgan elektr shkafi esa Serbiyaning Vlatacom kompaniyasi tomonidan ishlab chiqarilgan. Kompaniya saytida xabar berilishicha, Vlatacom'ning Safe City nomli dasturi doirasida kompaniya kuzatuv kameralarini o‘rnatish, transport oqimini boshqarish tizimlarini joriy etish bilan shug‘ullanadi. Ko‘chada o‘rnatilgan svetoforlar kim tomonidan — AGT, Vlatacom yoki mahalliy mutaxassislar tomonidan o‘rnatilgani haqida ma’lumot yo‘q.
Ta’kidlash joiz, Muqimiy va Akramxo‘jayev ko‘chalari chorrahasida atrof-muhitni kuzatishga mo‘ljallangan kameralar svetoforlar yonidagi simyog‘ochlarga o‘rnatilgan, ammo svetoforlar joylashgan kronshteynlarga avtomobillar tomon yo‘naltirilgan kameralar o‘rnatilmagan.
O‘rnatilgan yangi svetoforlarga havas bilan qarab turgan chog‘imizda, naq uchta qip-qizil chiroqni “ko‘rmay qolgan” “ko‘cha qiroli” — 01 U 585 AA davlat raqamiga ega Matiz svetoforda to‘xtab turgan avtomobillarni o‘ng tomondan aylanib o‘tib, harakatlanishda davom etdi.
Qoyil-e! Nimayam derdik.
