“Nasaf” klubi Osiyo Chempionlar ligasi guruh bosqichi doirasida “Traktorsozi”ga qarshi kechgan bahsda g‘alabaga erishdi. Uchrashuvda 2:1 hisobi qayd etildi, deb xabar beradi “Uff.uz”.
Birinchi bo‘lim davomida har ikki jamoa ham tashabbusga erishishga intilsa-da, gol kiritilmadi. Voqealar rivoji ikkinchi bo‘limga kelib jadallashib ketdi. Avvaliga “Traktorsozi” hisobni ochishga muvaffaq bo‘ldi. Erkin Boydullayev o‘z jarima maydonchasi yaqinida qo‘pollik qilgach, “Traktorsozi” qulay nuqtadan zarba berish imkoniyatini qo‘lga kiritdi. Bu imkoniyatni Mehdi Kiani juda chiroyli golga aylantirdi. Bu vaqtda uchrashuvning 51-daqiqasi davom etayotgan edi.
Ammo “Nasaf” ruhan sinib qolmadi va raqib darvozasi tomon bosimni kuchaytirdi. 56-daqiqada Odil Hamrobekov uzoq masofadan zarba berdi. Raqib darvozaboni to‘pni qo‘lidan chiqarib yubordi va bu vaqtda Artur Gevorkyan qaytgan to‘pni darvozaga yo‘llashga shay bo‘lib turgan edi. Uning boshi bilan birga zarbasi bexato chiqdi 1 :1.
Ikkinchi gol esa burchak to‘pi tepuvchilar uchun o‘quv qo‘llanmasi bo‘lib xizmat qilishi mumkin. Artur Gevorkyan burchakdan to‘pni shu qadar chiroyli tarzda aylantirib darvozaga yo‘lladiki, darvozabon vaziyatni anglagunga qadar gol bo‘lib ulgurgan edi.
Shundan so‘ng ham o‘yin shiddati kuchli bo‘ldi. Ammo “Nasaf” boshqa xatoga yo‘l qo‘ymadi va g‘alabaga erishdi. Qo‘shib berilgan daqiqalarda esa darvozabon Eldor Suyunov “uchrashuv qahramoni” degan nomning teng yarmini Artur Gevorkyandan “tortib oldi”. Darvozabon garchi jarohat olgan bo‘lishiga qaramay, maydonda qoldi va raqibning bosh bilan bergan kuchli va aniq zarbasini qaytarishga muvaffaq bo‘ldi.
Shu tariqa “Nasaf” tarixiy g‘alabani qo‘lga kiritdi.
OChL, D guruhi, 5-tur
“Traktorsozi” – “Nasaf”: 1:2
Gollar: Mehdi Kiani 51 - Artur Gevorkyan 56, Artur Gevorkyan 71
“Traktorsozi”: 1. Hamid Lak, 3. Habib Gordani, 4. Holid Shafiy, 6. Mehdi Kiani, 7. Saman Narimonjahon, 8. Shahin Sohibi, 12. Muhammad Purrahmat, 18. Amirkamdar Ahmad, 19. Mehrdod Bayrami, 23. Hani Hoshimi, 77. Said Agai.
“Nasaf”: 25. Eldorbek Suyunov, 4. Maqsud Karimov, 9. Ilhom Shomurodov, 15. Roy Rok, 17. Artur Gevorkyan, 20. Erkin Boydullayev, 22. Shohruh Gadoyev, 23. Sherzod Azamov, 32. Hamza Karimov, 33. Odiljon Hamrobekov, 34. Farruh Sayfiyev.
Izoh (0)