Qozog‘istonning Olma-Ota shahrida o‘tkazilgan Osiyo boks konfederatsiyasining Bosh Assambleyasida 2015-yilning 7—14-iyun kunlari o‘smirlar o‘rtasida bo‘lib o‘tadigan Osiyo chempionati bahslari Toshkent shahrida o‘tkazilishi e’lon qilindi. Bu haqda, Osiyo boks konfederatsiyasining rasmiy saytida (www.asiaboxing.org) ham rasman ma’lumot berilgan, deb yozadi O‘zbekiston Milliy olimpiya qo‘mitasi matbuot markazi.
Shu o‘rinda ta’kidlash joizki, boks bo‘yicha qit’a chempionati bahslari ikki bor O‘zbekistonda o‘tkazilgan. 1995-yili bo‘lib o‘tgan Osiyo chempionatida 1996-yili Atlanta (AQSh)da o‘tkazilgan Olimpiada o‘yinlarining yo‘llanmalari o‘ynalgan bo‘lsa, 1999-yili o‘tkazilgan qit’a chempionatida 2000-yilgi Sidney (Avstraliya)da bo‘lib o‘tgan Olimpiada o‘yinlarining litsenziyalari o‘ynalgan.
Joriy yil Toshkent shahrida tashkil etiladigan o‘smirlar o‘rtasidagi Osiyo chempionatida 1999—2000-yillarda tavallud topgan sportchilar g‘oliblik uchun bahslarga kirishadi. Ushbu yosh toifasida O‘zbekiston, Xitoy Taypeyi, Hindiston, Iordaniya, Qozog‘iston, Mo‘g‘uliston va Qirg‘iziston davlatlarida o‘smirlar o‘rtasida milliy birinchiliklar o‘tkazilib, Osiyo chempionatida ishtirok etadigan sportchilar saralab olingan.
Ayni paytda mazkur qit’a chempionatida Vatanimiz sharafini himoya qiladigan Rorimisha Profsor, Asadbek Avazov (-48 kg), Bilolbek Mirzarahimov (-54 kg), Dilshod Ruzmetov (-66 kg), Qosimxon Qosimov (-75 kg) va Abbosxon Mirzaabdullayev (-80 kg) kabi iqtidorli sportchilarimiz bo‘lajak nufuzli musobaqaga qizg‘in hozirlik ko‘rmoqda va terma jamoamiz murabbiylarining ulardan umidlari katta.
Izoh (0)