7-apreldan 24-aprelga qadar Toshkentdagi “Istiqlol” san’at saroyida O‘zbekiston hamda Qoraqolpog‘iston xalq artisti Ozodbek Nazarbekovning “Ardog‘imdasiz” deb nomlangan konsert dasturi bo‘lib o‘tmoqda. Konsert dasturidan o‘rin olgan bir-biridan yoqimli taronalar tashrif buyuruvchilarni sehrlab qo‘ymoqda, deb xabar beradi “Popcorn.uz”.

Ozodbek Nazarbekov. Foto: ozodbek.uz

Ozodbek Nazarbekov. Foto: ozodbek.uz

Ozodbekning bu galgi konsert dasturidan o‘rin olgan, barcha taronalaridan ajralib turuvchi “Aytib beraman” taronasi konsert zalini ko‘z yoshlarga to‘ldirdi.

Bundan bir necha oy ilgari yangiliklar va internet tarmog‘i orqali tarqalgan Suriyadagi adashgan o‘qning nishoni bo‘lgan bolaning joni uzilishi oldidan operatsiya stolida: “Hammangizni Allohimga aytib beraman”, – degan so‘zlari butun dunyoni larzaga solgan edi. Mana shu so‘zlardan ta’sirlangan, xalqning sevimli san’atkori Ozodbek Nazarbekov “Aytib ber” deb nomlangan qo‘shiq kuyladi.

Xabarlarga ko‘ra, mazkur qo‘shiq Ozodbek Nazarbekovning konserti boshlanishiga ikki kun qolganida tayyor bo‘lgan.

Eslatib o‘tamiz, avvalroq ijodkorning 100 foiz jonli ravishda kuylayotgani haqida xabar berilgan edi.