Bahorning iliq kunlarida Toshkent Fotosuratlar uyida Xalqaro hazil-mutoyiba kuniga bag‘ishlangan “Birga kulishaylik” deb nomlangan karikaturalar ko‘rgazmasi ochildi, deb xabar bermoqda O‘zbekiston Badiiy akademiyasi.
Unda Mahmud Eshonqulov, Radik Azizov, Solijon Mamatqulov, Nikolay Svirilenko, Husan Sodiqov, Farrux Teshayev, Furqat Usmonov, Jahongir Mirzo kabi qator taniqli karikaturachi rassomlar, jumladan “Dunyoning 100 ta eng yaxshi karikaturachi rassomi” va “Katta karikatura ensiklopediyasi” reytingiga kiruvchilar ishtirok etishdi. Ko‘rgazma ekspozitsiyasida 200 ga yaqin asarlar namoyish etilmoqda.
Ko‘rgazmaga qo‘yilgan rasmlar atrof-muhit, ekologiya, ijtimoiy-siyosiy, tibbiyot, urushga qarshi harakatlar, tinchlik, do‘stlik, tolerantlik, giyohvandlikka qarshi hamda hozirgi zamonaviy texnologiyalarning insonga bo‘lgan ta’siri mavzulariga bag‘ishlangan.
Tadbirda so‘zga chiqqanlar karikaturaning o‘zi bir necha turlarga bo‘linadi: satirik, yumoristik kabi karikaturalar ekanini ta’kidlashdi. Shuningdek, so‘nggi yillarda o‘zbek karikaturasi dunyoga keng tanildi. Bunda rassomlarimizning alohida o‘rni bor. Ayniqsa taniqli rassom Mahmud Eshonqulovning asarlari xalqaro eng nufuzli ko‘rgazma va tanlovlarda qator mukofotlar va sovrinlar bilan taqdirlangan.
Karikatura har qanday insonni kulishga, yig‘lashga, fikrlashga majbur qiladi. Karikaturaga mavzu topishning o‘zi bir jiddiy jarayon. Bunda, albatta, rassomdan ziyraklik, kuzatuvchanlik talab etiladi.
“Birga kulishaylik” ko‘rgazmasini tashkil etishdan asosiy maqsad milliy qadriyatlarimizni targ‘ibot qilish va ommalashtirish, insoniyatning ahloqiy kamoloti va taraqqiyot yo‘liga g‘ov bo‘ladigan barcha narsalar ustidan o‘tkir hajv, quvnoq hazil ruhida yaratilgan asarlar mavzusini kengaytirish va ularni namoyish qilishdir.
Karikatura san’ati doimo dolzarb bo‘lib kelgan. Karikatura har qanday holatlarda tezda javob bera oladigan, muammolar mohiyatini obrazli namoyish etadigan, o‘z nuqtai nazariga nigoh tashlaydigan noyob san’at turidir. Sog‘lom kulgi va yaxshi kayfiyat – ming dardga davo deyishadi. Yumor kishilar o‘rtasidagi ezgulik, tinchlik va do‘stlik g‘oyalariga xizmat qiladi. Yumor hissi, o‘zining ustidan kula olish qobiliyati, boshqalarga hayrihohlik, barcha jamiyatlar taraqqiyotining yuqori darajasini belgilaydi.
Mazkur ko‘rgazmada inson kamolotiga g‘ov bo‘layotgan ayrim illatlar hajv yordamida san’at ixlosmandlariga namoyish etildi. Ushbu asarlar kundalik hayotda uchraydigan kamchiliklar, inson fe’l-atvoridagi kulgi va hazilga moyil jihatlarni ta’sirchan va yorqin tarzda aks ettirgani bilan ahamiyatlidir.