Баҳорнинг илиқ кунларида Тошкент Фотосуратлар уйида Халқаро ҳазил-мутойиба кунига бағишланган «Бирга кулишайлик» деб номланган карикатуралар кўргазмаси очилди, деб хабар бермоқда Ўзбекистон Бадиий академияси.

Унда Маҳмуд Эшонқулов, Радик Азизов, Солижон Маматқулов, Николай Свириленко, Ҳусан Содиқов, Фаррух Тешаев, Фурқат Усмонов, Жаҳонгир Мирзо каби қатор таниқли карикатурачи рассомлар, жумладан «Дунёнинг 100 та энг яхши карикатурачи рассоми» ва «Катта карикатура энциклопедияси» рейтингига кирувчилар иштирок этишди. Кўргазма экспозициясида 200 га яқин асарлар намойиш этилмоқда.

Кўргазмага қўйилган расмлар атроф-муҳит, экология, ижтимоий-сиёсий, тиббиёт, урушга қарши ҳаракатлар, тинчлик, дўстлик, толерантлик, гиёҳвандликка қарши ҳамда ҳозирги замонавий технологияларнинг инсонга бўлган таъсири мавзуларига бағишланган.

Тадбирда сўзга чиққанлар карикатуранинг ўзи бир неча турларга бўлинади: сатирик, юмористик каби карикатуралар эканини таъкидлашди. Шунингдек, сўнгги йилларда ўзбек карикатураси дунёга кенг танилди. Бунда рассомларимизнинг алоҳида ўрни бор. Айниқса таниқли рассом Маҳмуд Эшонқуловнинг асарлари халқаро энг нуфузли кўргазма ва танловларда қатор мукофотлар ва совринлар билан тақдирланган.

Карикатура ҳар қандай инсонни кулишга, йиғлашга, фикрлашга мажбур қилади. Карикатурага мавзу топишнинг ўзи бир жиддий жараён. Бунда, албатта, рассомдан зийраклик, кузатувчанлик талаб этилади.

«Бирга кулишайлик» кўргазмасини ташкил этишдан асосий мақсад миллий қадриятларимизни тарғибот қилиш ва оммалаштириш, инсониятнинг аҳлоқий камолоти ва тараққиёт йўлига ғов бўладиган барча нарсалар устидан ўткир ҳажв, қувноқ ҳазил руҳида яратилган асарлар мавзусини кенгайтириш ва уларни намойиш қилишдир.

Карикатура санъати доимо долзарб бўлиб келган. Карикатура ҳар қандай ҳолатларда тезда жавоб бера оладиган, муаммолар моҳиятини образли намойиш этадиган, ўз нуқтаи назарига нигоҳ ташлайдиган ноёб санъат туридир. Соғлом кулги ва яхши кайфият – минг дардга даво дейишади. Юмор кишилар ўртасидаги эзгулик, тинчлик ва дўстлик ғояларига хизмат қилади. Юмор ҳисси, ўзининг устидан кула олиш қобилияти, бошқаларга ҳайриҳоҳлик, барча жамиятлар тараққиётининг юқори даражасини белгилайди.

Мазкур кўргазмада инсон камолотига ғов бўлаётган айрим иллатлар ҳажв ёрдамида санъат ихлосмандларига намойиш этилди. Ушбу асарлар кундалик ҳаётда учрайдиган камчиликлар, инсон феъл-атворидаги кулги ва ҳазилга мойил жиҳатларни таъсирчан ва ёрқин тарзда акс эттиргани билан аҳамиятлидир.