“Daryo” tahririyati shov-shuvsiz xabarlar saytini ishga tushirdi

“Daryo” nashri shov-shuvlardan charchagan mushtariylar uchun oddiy, shov-shuvsiz xabarlar sayti “Shov-shuvsiz”ni ishga tushirdi.

“‘Daryo’da yoritilayotgan xabarlarning o‘ta shov-shuvli ekanidan noligan mushtariylarimizdan ko‘plab maktublar olamiz. Shu sababli oddiy, shov-shuvsiz xabarlar saytini ishga tushirishga qaror qildik”, — dedi sayt rahbari Farhod Fayzullayev.

Ushbu o‘ziga xos saytda kundalik hayotimizda har kuni uchraydigan oddiy yangiliklar, hech qanday shov-shuvga sabab bo‘lmaydigan xabarlar berib boriladi. Umid qilamizki, “Shov-shuvsiz” sayti tez orada o‘z mushtariylariga ega bo‘ladi.

“Shov-shuvsiz” bilan siz nafaqat har kuni bo‘lib o‘tadigan oddiy voqealarni boshingizdan o‘tkazasiz, balki ularni o‘qib ham borasiz. Jumladan, quyosh chiqqani va botgani, hayot davom etayotgani haqidagi xabarlarni eng birinchi bo‘lib aynan shu saytdan topasiz.

Eslatib o‘tamiz, roppa-rosa bir yil avval “Daryo” ta’sischilari universal sevimli portal™ —Kulmak.uz®ni ishga tushirgan edi. Bir yil davomida sayt juda ommalashib, uning mushtariylari soni kun sayin ortib bormoqda.