Singapurda politsiya video joylashtirib, unda Li Kuan Yuni “qo‘rqinchli odam” deb atagan 17 yoshli bloger Amos Yini hibsga oldi, deya xabar bermoqda “RBK”.
Sakkiz daqiqali video YouTube’ga 27-mart kuni “Li Kuan Yu nihoyat vafot etdi!” degan nom ostida joylandi. Ushbu rolikda Yi: “Li Kuan Yu qo‘rqinchli odam edi… Hamma bunday gaplarni aytishdan qo‘rqardi, chunki ularning boshi baloga qolishi mumkin edi”, — dedi.
Bloger shuningdek haqoratomuz tavsiflarni qo‘llagan holda Li Kuan Yuni Iso Masihga qiyosladi.
Video e’lon qilingach, politsiyaga tuhmat va dindorlar hislarini haqorat qilish ayblari bo‘yicha ko‘plab shikoyatlar kelib tushdi.
Mustaqil Singapurning birinchi bosh vaziri Li Kuan Yu 22-mart kuni uzoq davom etgan kasallikdan so‘ng 91 yoshida vafot etdi.
Singapur davlatining asoschisi beshinchi fevral kuni o‘tkir zotiljam kasalligi bilan shifoxonaga yotqizilgan edi. Bosh vazir matbuot xizmati 18-mart kuni Li Kuan Yuning ahvoli yomonlashgani haqida bayonot berdi.
Ma’lumot uchun, Li Kuan Yu Singapur hukumati tepasiga 1959-yilda kelgan bo‘lib, davlatni 1990-yilgacha uzluksiz boshqargan. Aynan uning davrida Singapur qashshoq davlatlar qatoridan chiqib, dunyoning moliyaviy markazlaridan biriga aylangan, aholi turmush darajasi bo‘yicha esa yuqori uchlikdan joy olgan.
Izoh (0)