Сингапур полицияси 17 ёшли блогерни Ли Куан Ю ҳақидаги видеоси учун ҳибсга олди

Сингапурда полиция видео жойлаштириб, унда Ли Куан Юни «қўрқинчли одам» деб атаган 17 ёшли блогер Амос Йини ҳибсга олди, дея хабар бермоқда «РБК».

Саккиз дақиқали видео YouTube’га 27 март куни «Ли Куан Ю ниҳоят вафот этди!» деган ном остида жойланди. Ушбу роликда Йи: «Ли Куан Ю қўрқинчли одам эди… Ҳамма бундай гапларни айтишдан қўрқарди, чунки уларнинг боши балога қолиши мумкин эди», — деди.

Блогер шунингдек ҳақоратомуз тавсифларни қўллаган ҳолда Ли Куан Юни Исо Масиҳга қиёслади.

Видео эълон қилингач, полицияга туҳмат ва диндорлар ҳисларини ҳақорат қилиш айблари бўйича кўплаб шикоятлар келиб тушди.

Мустақил Сингапурнинг биринчи бош вазири Ли Куан Ю 22 март куни узоқ давом этган касалликдан сўнг 91 ёшида вафот этди.

Сингапур давлатининг асосчиси бешинчи февраль куни ўткир зотилжам касаллиги билан шифохонага ётқизилган эди. Бош вазир матбуот хизмати 18 март куни Ли Куан Юнинг аҳволи ёмонлашгани ҳақида баёнот берди.

Маълумот учун, Ли Куан Ю Сингапур ҳукумати тепасига 1959 йилда келган бўлиб, давлатни 1990 йилгача узлуксиз бошқарган. Айнан унинг даврида Сингапур қашшоқ давлатлар қаторидан чиқиб, дунёнинг молиявий марказларидан бирига айланган, аҳоли турмуш даражаси бўйича эса юқори учликдан жой олган.