Samarqand viloyatida 2015-yilda umumiy uzunligi 107,3 kilometr bo‘lgan avtoyo‘llarni rekonstruksiya qilish ko‘zda tutilgan. Bu haqda “Samavtoyo‘l” avtomobillardan foydalanish mintaqaviy boshqarmasi rahbari Rauf Isoqov ma’lum qildi, deb xabar bermoqda “12news.uz”.

Uning so‘zlariga ko‘ra, bundan 50 kilometri qishloq aholi punktlari yo‘llari, 42,6 kilometri ichki xo‘jalik avtomobil yo‘llari hisoblanadi. Bu maqsadlar uchun jami 8,7 milliard so‘mdan ortiq byudjet mablag‘lari ajratilgan.

“Hozirgi kunda 147 kilometri Samarqand viloyati hududidan o‘tgan Toshkent−Buxoro−Turkmanboshi avtomagistrali rekonstruksiyasining ikkinchi bosqichi yakunlanmoqda. Ushbu loyiha xalqaro darajadagi Olma-ota−Bishkek−Toshkent−Termiz, Samarqand−Ayniy, Samarqand−Qarshi magistrallari qurilishi va ta’mirlanishini ham o‘z ichiga oluvchi maxsus investitsiya dasturi doirasida amalga oshirilmoqda. O‘tgan yili 1 milliard 208 million so‘mlik ishlar bajarildi”, − dedi Isoqov.