O‘zbekiston Respublikasi Prezidenti saylovida ovoz berish jarayoni davom etmoqda. Toshkent vaqti bilan soat 17.00 ga qadar saylovda 17 million 728 ming nafardan ziyod fuqaro ishtirok etdi. Bu saylovchilar umumiy sonining 85,2 foizini tashkil etadi. O‘zbekiston Respublikasi Prezidenti saylovini yoritish bo‘yicha Respublika matbuot markazida xalqaro kuzatuvchilar, mamlakatimiz va xorijiy ommaviy axborot vositalari vakillari uchun o‘tkazilgan brifingda shu haqda ma’lum qilindi, deb yozadi Markaziy saylov komissiyasi rasmiy sayti.
Markaziy saylov komissiyasi raisi M.Abdusalomov O‘zbekiston Respublikasining Yaponiya, Koreya Respublikasi, Malayziya, Singapur, Xitoy, Indoneziya va Tailanddagi vakolatxonalari huzurida tashkil etilgan saylov uchastkalarida ovoz berish jarayoni yakunlanganini ma’lum qildi.
Mamlakatimizning Afg‘oniston, Ozarbayjon, Birlashgan Arab Amirliklari, Eron, Quvayt, Saudiya Arabistoni, Misr, Pokiston, Hindiston, shuningdek, Yevropa va qo‘shni davlatlardagi vakolatxonalarida tashkil etilgan saylov uchastkalarida ovoz berish jarayoni davom etmoqda.
O‘zbekiston Respublikasining Amerika Qo‘shma Shtatlaridagi vakolatxonalari huzurida tashkil etilgan saylov uchastkalari ham ochildi. Saylov O‘zbekiston Respublikasi Konstitutsiyasi, “O‘zbekiston Respublikasi Prezidenti saylovi to‘g‘risida”gi va boshqa qonunlarda mustahkamlangan demokratik prinsiplarga muvofiq ravishda o‘tmoqda. Ayni paytgacha Markaziy saylov komissiyasiga saylov qonunchiligi buzilishi haqida xabar kelib tushmadi. Ovoz berishning yakunlariga bag‘ishlangan navbatdagi brifing Toshkent vaqti bilan soat 22.00 da o‘tkaziladi.
Izoh (0)