MDH ijroiya qo‘mitasi raisi – Ijrochi kotibi Sergey Lebedev O‘zbekistonda o‘tkazilayotgan saylov umume’tirof etilgan xalqaro standartlarga to‘la mos kelishini aytdi, deb yozadi O‘zA.
“Missiyamiz tarkibiga Mustaqil davlatlar hamdo‘stligidan 72 vakil kiritilgan. Ushbu guruh rahbari sifatida Toshkent va Jizzax viloyatlaridagi saylov uchastkalarini kuzatar ekanman, saylovga har tomonlama puxta tayyorgarlik ko‘rilganiga guvoh bo‘ldim. Bu saylov tashkiliy jihatdan yuksak saviyada o‘tishini anglatadi. Kim bilan suhbatda bo‘lmaylik, barcha fuqarolar mamlakatda hukm surayotgan tinchlik, barqarorlik va taraqqiyot bardavom bo‘lishi uchun ovoz berishini bildirdi. Darhaqiqat, O‘zbekiston barqaror taraqqiyot va rivojlanish yo‘lidan bormoqda. Barcha shaharu qishloqlar obod va go‘zal. Ayniqsa, Jizzaxda ro‘y bergan o‘zgarish va yangilanishlarni ko‘rib quvondim. Shahar juda o‘zgarib ketibdi. Missiyamiz vakillari bunday o‘zgarishlardan g‘oyat mamnun”, — dedi Lebedev.
Uning so‘zlariga ko‘ra, saylov komissiyalari tizimi tomonidan amalga oshirilgan keng ko‘lamli tayyorgarlik ishlari ovoz berishning yuksak saviyada o‘tayotganida ham ko‘rinib turibdi. “Saylovchilar juda faol, ayniqsa, yoshlar. Bir so‘z bilan aytganda, saylov demokratik tamoyillar asosida o‘tmoqda”, — deya qo‘shimcha qildi MDH ijroiya qo‘mitasi raisi.
Izoh (0)