KXDR AQSh va Janubiy Koreyaning Key Resolve va Foal Eagle harbiy manyovrlarini “xalq respublikasining ijtimoiy tuzumini ag‘darishga qaratilgan AQSh strategiyasi doirasidagi zo‘ravonlik harakati” deb hisoblaydi. Bu haqda Shimoliy Koreya Tashqi ishlar vazirligi vakili ma’lum qildi, deb xabar bermoqda “TASS”.
Vazirlik vakilining so‘zlariga ko‘ra, 2-mart kuni boshlangan yig‘inlar davomida AQSh tomonidan ko‘rsatiladigan eng kichik provokatsiyaga ham KXDR “vatanni birlashtirish uchun buyuk urush boshlash” bilan javob qaytarishga tayyor. Bayonotda aytilishicha, AQSh harbiy bosim orqali KXDR iqtisodiy taraqqiyotga e’tibor qaratishiga hamda Shimol va Janub o‘rtasidagi munosabatlar yaxshilanishiga yo‘l qo‘ymaslikni maqsad qilgan.
Qayd etilishicha, AQSh va Janubiy Koreyaning bu yilgi Foal Eagle qo‘shma harbiy yig‘ini 24-aprelgacha davom etadi hamda unga Koreya Respublikasining 200 ming harbiy xizmatchisi va AQShning 3,7 ming kishilik harbiy kontingenti qatnashadi. 13-martgacha davom etadigan Key Resolve manyovrlarida esa 10 ming koreyalik, 8,6 ming amerikalik harbiy ishtirok etadi.
Izoh (0)