КХДР АҚШ ва Жанубий Кореянинг Key Resolve ва Foal Eagle ҳарбий манёврларини «халқ республикасининг ижтимоий тузумини ағдаришга қаратилган АҚШ стратегияси доирасидаги зўравонлик ҳаракати» деб ҳисоблайди. Бу ҳақда Шимолий Корея Ташқи ишлар вазирлиги вакили маълум қилди, деб хабар бермоқда ТАСС.
Вазирлик вакилининг сўзларига кўра, 2 март куни бошланган йиғинлар давомида АҚШ томонидан кўрсатиладиган энг кичик провокацияга ҳам КХДР «ватанни бирлаштириш учун буюк уруш бошлаш» билан жавоб қайтаришга тайёр. Баёнотда айтилишича, АҚШ ҳарбий босим орқали КХДР иқтисодий тараққиётга эътибор қаратишига ҳамда Шимол ва Жануб ўртасидаги муносабатлар яхшиланишига йўл қўймасликни мақсад қилган.
Қайд этилишича, АҚШ ва Жанубий Кореянинг бу йилги Foal Eagle қўшма ҳарбий йиғини 24 апрелгача давом этади ҳамда унга Корея Республикасининг 200 минг ҳарбий хизматчиси ва АҚШнинг 3,7 минг кишилик ҳарбий контингенти қатнашади. 13 мартгача давом этадиган Key Resolve манёврларида эса 10 минг кореялик, 8,6 минг америкалик ҳарбий иштирок этади.