Qirg‘izistonda prezident Qurmanbek Bakiyev rejimining ag‘darilishi bilan tugagan ommaviy namoyishlar chog‘ida halok bo‘lgan va jabrlanganlarning qarindoshlari 27-fevral, juma kuni Belarusning Bishkekdagi elchixonasi yonida miting uyushtirdi, deya xabar bermoqda “RIA Novosti”. Ular sobiq prezident oila a’zolarining ekstraditsiyasini talab qildi.
Namoyishchilar shuningdek Belarusning Bishkekdagi elchisi bilan uchrashishni talab qilmoqda, ular undan o‘z vatanida odillik bilan sud qilinishi uchun sobiq prezident oila a’zolarini topshirish haqidagi talablarini bildirmoqchi.
Mitingda 30 ga yaqin kishi qatnashmoqda. Aksiyalar chog‘ida o‘ndan ziyod militsiya xodimlari tartib ustidan nazoratni ushlab turibdi.
Eslatib o‘tamiz, Qirg‘iziston sobiq prezidenti Qurmanbek Bakiyev 2010-yil 7-apreldagi ommaviy qirg‘inni uyushtirishga aloqador deb topilib, mol-mulki musodara qilingan holda umrbod qamoq jazosiga sirtdan hukm qilingan edi.
Avvalroq Qurmanbek Bakiyev Buyuk Britaniya fuqarosi Shon Deyliga suiqasd tashkil qilishda ayblanib 25 yilga ozodlikdan mahrum qilingan edi.
Bakiyev 2005–2010-yillarda prezidentlik qilgan. 2010-yil aprel voqealarida qo‘zg‘olonchilar va hukumat kuchlari o‘rtasidagi to‘qnashuvlarda 80 dan ortiq kishi halok bo‘lgan, yana 300 kishi yaralangan. To‘ntarishdan keyin prezident Aleksandr Lukashenko taklifi bilan Belorussiyaga ketgan. Qirg‘iziston hukumati tepasiga kelgan raqiblari Bakiyevni topshirishni talab etishgan, ammo Belorussiya uni Qirg‘izistonga topshirishdan bosh tortgan.
Izoh (0)