26-yanvar kuni “Sport” kanali orqali efirga uzatilgan “Futbol sharhi” ko‘rsatuvi mehmoni bo‘lgan O‘zbekiston terma jamoasi bosh murabbiyi Mirjalol Qosimov jamoaning o‘yini va natijasidan O‘FF rahbariyati qoniqish hosil qilganini ta’kidladi. Bu haqda “Stadion.uz” xabar berdi.
“Bugun ertalab O‘zbekiston futbol federatsiyasini prezidenti Mirabror Usmonov terma jamoa futbolchilari va murabbiylar shtabi bilan uchrashdi. Mirabror Zufarovich uchrashuv chog‘ida futbolchilarga Osiyo kubogidagi o‘yinlari uchun minnatdorchilik bildirdi va terma jamoa qayd etgan natijani qoniqarli deb topdi. O‘FF rahbari futbolchilarning keyingi faoliyatiga omadlar tiladi. O‘ylaymanki, Xitoyga qarshi o‘yin va yakuniy natijani inobatga olmaganda, muxlislarimiz terma jamoa o‘yinlaridan mamnun bo‘lishdi”, — deydi Mirjalol Qosimov.
Terma jamoa bosh murabbiyi chorak finalda Janubiy Koreyaga qarshi o‘yinda Server Jeparovni nima uchun maydonga tushirmaganini quyidagicha izohladi:
“Koreyaga qarshi o‘yinda Odil Ahmedovning jarohat olishi rejamizni o‘zgartirishga majbur qildi. Koreyaliklarga qarshi o‘yinda mustahkam va zich himoya asosida o‘ynayotganimiz uchun Odilning o‘rniga Kapadzeni tushirishga qaror qildim. O‘yin oxirida esa Lutfulla To‘rayevning o‘rniga Jeparov yoki Iskandarovni tushirish kerak bo‘lganida, meni Jamshidni tanladim. Boisi, unda Xudo tomonidan berilgan nozik pas berish qobiliyati bor. Qolaversa, Iskandarov va Rashidov bir-birlarini yaxshi tushunishadi, ular yaxshi tandem hosil qilishadi. Shu bois, Serverni emas, Jamshidni maydonga tushirdim”, - deydi O‘zbekiston terma jamoasi bosh murabbiyi.
Izoh (0)