Bugun Shveysariyaning Syurix shahrida 2014-yilning eng yaxshi futbolchisiga “Oltin to‘p” mukofotini topshirish marosimi tashkillashtiriladi, deb xabar bermoqda “Stadion.uz”.
Yilning eng yaxshi futbolchisi deb e’tirof etilishni uch nafar futbolchi kutmoqda. Aniqrog‘i ikki nafar futbolchi. Chunki, asosiy nomzod sifatida ko‘rilayotgan uch nafar futbolchi – “Real” hujumchisi Krishtianu Ronaldu, “Barselona” hujumchisi Lionel Messi va “Bavariya” darvozaboni Manuel Noyerdan biri, argentinalik Messi bu yilgi taqdimotda o‘zi g‘olib bo‘lishiga ishonmayapti.
U bu boradagi fikrlarini ispaniyalik jurnalistlarga bayon qilgan. “Bu yilgi mukofotga kim ega chiqishini aniq bilmayman. ‘Oltin to‘p’ kim bunga munosib bo‘lsa, o‘sha futbolchiga beriladi. Ronaldu va Noyer ham ajoyib mavsum o‘tkazishdi”, – dedi Messi.
Shuningdek, u o‘z jamoadoshi Luis Suares ham o‘tgan mavsumda “Liverpul” safida ajoyib maxsum o‘tkazganini aytgan, o‘z imkoniyatlari haqida esa, indamagan.
Eslatib o‘tamiz, Lionel Messining o‘zi muqaddam bu mukofotga 4 marotaba 2009, 2010, 2011 va 2012-yillarda ega chiqqan.
Ma’lumot uchun, FIFA bilan aloqalarini uzgan “Barselona” jamoasi bugungi marosimda qatnashmasligini ma’lum qilgan.
Bugun shuningdek, Syurixda “Yilning eng yaxshi murabbiyi”, “Yilning eng yaxshi goli muallifi”, “Yil ramziy terma jamoasi” hamda “Yilning eng yaxshi ayol futbolchisi” nomlari ham e’lon qilinadi. Marosim Toshkent vaqti bilan 22:30 da boshlanadi.
Izoh (0)