Buxoro viloyatining Qorovulbozor shahrida yosh oilalar uchun zamonaviy turar-joy foydalanishga topshirildi, deb xabar beradi O‘zbekiston Milliy axborot agentligi.
Shu munosabat bilan tashkil etilgan tadbirda Prezident rahnamoligida aholini ijtimoiy himoya qilish, yashash shart-sharoitlarini yanada yaxshilashga alohida e’tibor qaratilayotgani ta’kidlandi.
Buxoro neftni qayta ishlash zavodi mablag‘i hisobidan barpo etilgan ushbu turar-joy kvartiralari korxonaning 27 nafar ishchisiga tuhfa etildi. Ayni kunda ular oilasi bilan yangi uyga ko‘chib o‘tmoqda.
Ta’kidlash joiz, o‘tgan yillar davomida Buxoro neftni qayta ishlash zavodi tomonidan 700 dan ziyod oilaga mo‘ljallangan kottejlar, shuningdek, yoshlar markazi va mehmonxona, yopiq sport majmuasi, san’at saroyi, servis va maishiy xizmat ko‘rsatish obyektlarini o‘z ichiga olgan neftchilar qo‘rg‘oni qurildi. Uning yaqinida 15 gektarli ko‘l barpo etildi. Bu yerdagi qulaylik va imkoniyatlardan nafaqat zavod ishchilari yoki ularning oila a’zolari, balki butun Qorovulbozor shahri ahli bahramand bo‘lmoqda.
Korxona kapital qurilish bo‘limi boshlig‘i Zarif Xo‘jayevning aytishicha, joriy yilda zavod mablag‘i hisobidan yana bitta yirik sport majmuasi, ishchi-xizmatchilar uchun har biri 18 kvartirali ikkita uy qurilishi ko‘zda tutilmoqda.
Izoh (0)