Yangi yilga dudlangan mol go‘shtidan salat tayyorlaymiz

“Daryo” nashrining Korzinka.uz supermarketlar tarmog‘i bilan hamkorlikdagi Yangi yilga bag‘ishlangan loyihasi doirasida bayram dasturxoniga tortish mumkin bo‘lgan taomlar retseptini taqdim etib borishda davom etamiz.

Bugungi taomnomada — dudlangan mol go‘shtidan salat

Ushbu salatni tayyorlash uchun taxminan 20 daqiqa vaqt va 14 540 so‘m talab etiladi.

Zarur masalliqlar:

• 1 bosh “Aysberg” karami
• 1 bog‘ salat bargi
• 1 bog‘ rukkola
• 100 g zaytun mevasi
• 100 cherri pomidori
• 50 g bulg‘or qalampiri
• 10 g qizil piyoz
• 50 g dudlangan mol go‘shti
• 10 g maskarpone pishlog‘i
• 30 g zaytun yog‘i
• 5 g uzum sirkasi
• 10 g asal
• 10 g parmezan pishlog‘i
• tuz
• murch

Tayyorlanishi:

1. 1 bosh “Aysberg” karami, 1 bog‘ salat bargi va rukkolani yaxshilab yuvib, yirik-yirik bo‘laklarga bo‘lamiz va idishga solamiz.

2. Ustiga po‘sti archilib, ikki bo‘lakka bo‘lingan 100 g cherri pomidorini qo‘shamiz.

3. Zaytun mevalarini 2—3 bo‘lakka bo‘lib, ularni ham salatga qo‘shamiz.

4. Ustidan mayda tishli qirg‘ichdan chiqarilgan parmezan pishlog‘ini sepamiz.

5.  Ustiga ta’bga ko‘ra tuz va murch qo‘shamiz.

6. Endi sousni tayyorlab olamiz. Buning uchun alohida idishga 30 ml zaytun yog‘i, 10 g asal, 5 g uzum sirkasini solamiz.

7. Sousga mayda to‘rtburchak shaklida to‘g‘ralgan qizil piyozni ham qo‘shib yuboramiz.

8. Sousni yaxshilab aralashtirib, avval tayyorlangan boshqa masalliqlarga qo‘shamiz.

9. Salat tayyorlashning keyingi bosqichiga o‘tamiz. Dudlangan mol go‘shtini olib, yupqa qilib kesamiz.

10. Ushbu bo‘laklarga maskarpone pishlog‘idan suramiz.

11. Uzun-uzun to‘g‘ralgan bulg‘or qalampirlari bo‘lakchalarini bittadan qo‘yib chiqamiz.

12. So‘ng ularni rulet qilib o‘raymiz.

13. Likop olib, unga dastlab sous bilan aralashtirilgan salatni qo‘yamiz, ustidan dudlangan mol go‘shtidan yasalgan ruletlarni qo‘yib chiqamiz.

14. Ustiga qirg‘ichdan chiqarilgan parmezan pishlog‘ini sepamiz.

Salatimiz tayyor. Yoqimli ishtaha!

Ushbu taomni tayyorlashda foydalanilgan mahsulotlarni Korzinka.uz supermarketlaridan xarid qilishingiz mumkin.

Ularning narxlari bilan quyidagi jadvalda tanishishingiz mumkin. Narxlar 26-dekabr holatiga keltirilgan.

Rukn homiysi — Korzinka.uz supermarketlar tarmog‘i.

Taomni tayyorlashda bergan ko‘magi uchun Toshkentdagi  Affresco qahvaxonasi va shaxsan bosh oshpaz Irena Purtseladzega minnatdorchilik bildiramiz.

Ruknimizning keyingi sonlarida syomga balig‘i va rukkoladan salat tayyorlaymiz, ananas bilan tovuq pishiramiz hamda ular bilan Yangi yil dasturxonini bezatamiz.