Barcha saylov uchastkalarida O‘zbekiston Respublikasi Oliy Majlisi Qonunchilik palatasi, xalq deputatlari viloyat, tuman va shahar Kengashlariga deputatlarni saylash bo‘yicha ovoz berish davom etmoqda, deb xabar beradi O‘zbekiston Milliy axborot agentligi.
Toshkent vaqti bilan soat 17.00 gacha saylovda 16,2 million fuqaro ishtirok etdi. Bu ro‘yxatga olingan jami saylovchilarning 78,4 foizini tashkil etadi.
Ushbu ma’lumotlarni O‘zbekiston Respublikasi Markaziy saylov komissiyasi raisining o‘rinbosari S. Ortiqova 2014-yilgi saylovni yoritish bo‘yicha respublika matbuot markazida O‘zbekiston va chet el ommaviy axborot vositalari vakillari uchun o‘tkazilgan navbatdagi brifingda ma’lum qildi.
O‘zbekiston Respublikasining Afg‘oniston, Ozarbayjon, Birlashgan Arab Amirliklari, AQSh, Eron, Quvayt, Saudiya Arabistoni, Rossiya, Ukraina, Misr, Gretsiya, Latviya, Turkiya, Avstriya, Belgiya, Germaniya, Ispaniya, Italiya, Polsha, Fransiya, Shveysariya, Buyuk Britaniya va boshqa mamlakatlardagi vakolatxonalari huzurida tashkil etilgan 44 saylov uchastkasida ham ovoz berish jarayoni bo‘lib o‘tayotgani qayd etildi.
O‘zbekistonning Yaponiya, Koreya Respublikasi, Malayziya, Singapur, Xitoy, Indoneziya va Tailanddagi vakolatxonalari huzurida tashkil etilgan saylov uchastkalarida ovoz berish jarayoni yakunlandi.
O‘zbekiston Ekologik harakatining O‘zbekiston Respublikasi Oliy Majlisi Qonunchilik palatasiga 15 nafar deputatni saylashga bag‘ishlangan konferensiyasi davom emoqda.
Brifingda ayni paytgacha Markaziy saylov komissiyasiga saylov jarayoni davomida saylov qonunchiligi buzilishi bilan bog‘liq holatlar haqida birorta ham ma’lumot tushmagani ta’kidlandi.
Markaziy saylov komissiyasining navbatdagi brifingi soat 22.00 da bo‘lib o‘tadi.