Hududlardan tashrif buyurgan “Yosh tadbirkor” konsultativ markazining 110 nafar koordinator va biznes trenerlari uchun joriy yilning 16—20-noyabr kunlari Toshkent viloyati Bo‘stonliq tumanida joylashgan “Kamolot yoshlar oromgohi”da “Yoshlarni tadbirkorlikka keng jalb etish maqsadida barcha hududlarda yosh tadbirkorlar uchun ‘Biznes inkubator’larni tashkil etish”ga qaratilgan o‘quv-seminar o‘tkazildi. Bu haqda tahririyatga “Kamolot” YoIH Markaziy Kengashidan kelib tushgan press-relizda so‘z boradi.
O‘quv-seminar dasturiga asosan, Harakat tomonidan yoshlarni, ayniqsa, kasb-hunar kollejlari bitiruvchilarini kichik biznes va xususiy tadbirkorlik sohasida olib borilayotgan loyihalar targ‘iboti rejasini ishlab chiqish, joylarda biznes inkubatorlarni tashkil etish, yangi ijtimoiy tadbirkorlik loyihalarini ishlab chiqishga jalb etish bo‘yicha seminarlar tashkil etildi.
Bundan tashqari, seminarlarning bir qismi yoshlar tadbirkorligini OAVda kengroq yoritish, tadbirkorlik malaka va ko‘nikmalarini shakllantirishga qaratilgan modul ishlab chiqish va shular orqali ularning bandligini ta’minlash kabi mavzularga bag‘ishlandi.
Shuningdek, joylarda “Biznes inkubator”lar faoliyatini tashkil etishga ko‘maklashish maqsadida Savdo-sanoat palatasi, O‘zbekiston Respublikasi xususiylashtirish, monopoliyadan chiqarish va raqobatni rivojlantirish davlat qo‘mitasi, Toshkent shahri va Toshkent viloyati hokimliklarining malakali mutaxassislari tomonidan “Savdo-sanoat palatasining yosh tadbirkorlar uchun ‘Biznes inkubator’lar tashkil etishdagi o‘rni”, “Davlat inshootlaridan foydalanishning huquqiy asoslari”, “Toshkent shahri va Toshkent viloyati hududida yosh tadbirkorlar uchun ‘Biznes inkubator’larni tashkil etish imkoniyatlari” mavzularida o‘qigan ma’ruzalari tinglanib, savollarga javob olindi.
O‘quv-seminar yakuniga ko‘ra, “Yosh tadbirkor” konsultativ markazlari koordinatori va biznes trenerlari bilan hamjihatlikda 2015-yilga mo‘ljallangan na’munali ish reja hamda 2015-yilning 1-choragida yosh tadbirkorlar uchun hududlarda “Biznes inkubator”lar tashil etish va yo‘lga qo‘yish kabi maqsadli vazifalar belgilandi.
Izoh (0)