Xorazmlik fuqaroning xonadonidan 2 million so‘m o‘g‘irlagan shaxs qo‘lga olindi

Xorazm viloyatining Gurlan tumanida istiqomat qiluvchi fuqaro tuman IIBga ariza bilan murojaat qildi, deb xabar beradi Ichki ishlar vazirligining “Postda” gazetasi.

Qayd etilishicha, noma’lum shaxs kechasi gurlanlik fuqaroning uyiga kirib, ikki million so‘m pulini o‘g‘irlab ketgan. Murojaat asosida tezkor surishtiruv ishlari olib borildi.

O‘z vaqtida ko‘rilgan choralar tufayli gumon qilinuvchi tezda qo‘lga olindi: u shu tumanda yashovchi muqaddam sudlangan shaxs bo‘lib chiqdi. Unga nisbatan jinoyat ishi qo‘zg‘atildi.