O‘zbekiston milliy terma jamoasi va Rossiyaning “Lokomotiv” klubi himoyachisi Vitaliy Denisov Avstraliyada bo‘lib o‘tadigan Osiyo Kubogi — 2015 haqidagi fikrlari bilan o‘rtoqlashdi, deb xabar beradi “Uff.uz”.
“Bizning guruhimizda to‘rtta jamoa — O‘zbekiston, Saudiya Arabistoni, Xitoy va KXDR kuch sinashadi. Fikrimcha, bizda pley-offga chiqish uchun imkoniyat yetarli darajada. Turnirning favoritlari — Koreya, Avstraliya va ayni paytda kubok egasi bo‘lgan Yaponiya termalaridir. O‘zbekiston termasi ham Osiyoda kuchli beshtalikka kiradi va bosh sovringa asosiy da’vogarlardan biri hisoblanadi.
Men o‘z jamoamni Osiyo Kubogida ulkan g‘alabalarni qo‘lga kiritishiga ishonaman. To‘g‘risi, o‘sha ardoqli kubokni boshimiz uzra ko‘tarishni juda-juda xohlayapman. Terma jamoamizning bosh murabbiyi rus ishqibozlariga ‘Alaniya’ va ‘Krilya Sovetov’ safidagi o‘yinlari bilan tanilgan Mirjalol Qosimovdir.
Tarkibdagi futbolchilarga keladigan bo‘lsak, termamizni hujumga boshlab maydonda yetakchilik qiladigan ikkita taniqli futbolchisi bor, bular — Odil Ahmedov va Server Jeparov. Bundan tashqari, jamoamizga bir necha iqtidorli yoshlar ham qo‘shilib, ajoyib o‘yin ko‘rsatmoqda. Turnir oldidan biz BAA davlatida ikkita mashg‘ulot yig‘inlarini o‘tkazamiz. Mana shu yig‘inlarda terma jamoa safida Avstraliyaga kimlar borishi aniqlanadi”, — dedi Vitaliy Denisov.
Izoh (0)