Виталий Денисов: «Осиё Кубогини бошим узра кўтаришни жуда-жуда хоҳлайман»

Ўзбекистон миллий терма жамоаси ва Россиянинг «Локомотив» клуби ҳимоячиси Виталий Денисов Австралияда бўлиб ўтадиган Осиё Кубоги — 2015 ҳақидаги фикрлари билан ўртоқлашди, деб хабар беради «Uff.uz».

«Бизнинг гуруҳимизда тўртта жамоа — Ўзбекистон, Саудия Арабистони, Хитой ва КХДР куч синашади. Фикримча, бизда плей-оффга чиқиш учун имконият етарли даражада. Турнирнинг фаворитлари — Корея, Австралия ва айни пайтда кубок эгаси бўлган Япония термаларидир. Ўзбекистон термаси ҳам Осиёда кучли бешталикка киради ва бош совринга асосий даъвогарлардан бири ҳисобланади.

Мен ўз жамоамни Осиё Кубогида улкан ғалабаларни қўлга киритишига ишонаман. Тўғриси, ўша ардоқли кубокни бошимиз узра кўтаришни жуда-жуда хоҳлаяпман. Терма жамоамизнинг бош мураббийи рус ишқибозларига ‘Алания’ ва ‘Крилья Советов’ сафидаги ўйинлари билан танилган Миржалол Қосимовдир.

Таркибдаги футболчиларга келадиган бўлсак, термамизни ҳужумга бошлаб майдонда етакчилик қиладиган иккита таниқли футболчиси бор, булар — Одил Аҳмедов ва Сервер Жепаров. Бундан ташқари, жамоамизга бир неча иқтидорли ёшлар ҳам қўшилиб, ажойиб ўйин кўрсатмоқда. Турнир олдидан биз БАА давлатида иккита машғулот йиғинларини ўтказамиз. Мана шу йиғинларда терма жамоа сафида Австралияга кимлар бориши аниқланади», — деди Виталий Денисов.