O‘zbekiston Jahon banki guruhiga kiruvchi Xalqaro taraqqiyot uyushmasi ustav kapitalidagi qo‘shimcha aksiyalarga ega bo‘ladi.
O‘zbekiston Prezidenti Islom Karimov 31-oktabr kuni “O‘zbekiston Respublikasining Xalqaro taraqqiyot uyushmasi ustav kapitalidagi qo‘shimcha aksiyalarga obuna bo‘lishi to‘g‘risida”gi qarorni (pdf) imzoladi.
Hujjat Xalqaro taraqqiyot uyushmasi bilan hamkorlikni yanada kengaytirish, shuningdek uyushmaning ustav kapitali ko‘payishi munosabati bilan O‘zbekiston Respublikasining undagi boshlang‘ich ulushini saqlab qolish maqsadida qabul qilindi.
Qarorda ta’kidlanishicha, Xalqaro taraqqiyot uyushmasi (XTU) Boshqaruvchilar kengashi tomonidan XTUning ustav kapitalini ko‘paytirish va XTUga a’zo mamlakatlarning XTU ustav kapitalidagi ulushlarini saqlab qolish maqsadida qo‘shimcha aksiyalarga obuna bo‘lishlarini tashkil etish to‘g‘risida qaror qabul qilingan.
Prezident O‘zbekiston Respublikasi Iqtisodiyot vazirligi, Moliya vazirligi va Markaziy bankining XTUning ustav kapitalidagi 7972 ta aksiyaga, shu jumladan nominal qiymati 25 AQSh dollari bo‘lgan jami 54,3 ming AQSh dollari miqdoridagi 2172 ta haq to‘lanadigan aksiya hamda 5800 ta haq to‘lanmaydigan aksiyalarga obuna bo‘lish to‘g‘risidagi taklifini ma’qulladi.
O‘zbekiston Respublikasi moliya vaziriga O‘zbekiston Respublikasini XTUning ustav kapitalidan qo‘shimcha aksiyalar xarid qilish niyati borligi to‘g‘risidagi yozma majburiyatni O‘zbekiston Respublikasi nomidan imzolash vakolati berildi.
XTUning ustav kapitalidagi 2172 ta haq to‘lanadigan aksiyalar uchun to‘lov O‘zbekiston Respublikasi Markaziy banki tomonidan XTUning O‘zbekiston Respublikasi Markaziy bankidagi hisobvarag‘ida joylashtiriladigan hamda XTUning talabiga binoan belgilangan tartibda so‘ndiriladigan milliy valyutada ekvivalent qiymatda boshqaga o‘tkazilmaydigan veksel chiqarish yo‘li bilan amalga oshiriladi.
Prezident O‘zbekiston Respublikasi Markaziy bankiga obuna bo‘lish to‘g‘risidagi hujjat yuborilgandan so‘ng 31 kun mobaynida milliy valyutada 54300 AQSh dollariga ekvivalnt qiymatdagi boshqaga o‘tkazilmaydigan foizsiz veksel chiqarib, uni XTUning O‘zbekiston Resoublikasi Markaziy bankidagi qimmatli qog‘ozlar hisobvarag‘iga joylashtirish yuklandi.
Izoh (0)