Ўзбекистон Жаҳон банки гуруҳига кирувчи Халқаро тараққиёт уюшмаси устав капиталидаги қўшимча акцияларга эга бўлади.
Ўзбекистон Президенти Ислом Каримов 31 октябрь куни «Ўзбекистон Республикасининг Халқаро тараққиёт уюшмаси устав капиталидаги қўшимча акцияларга обуна бўлиши тўғрисида»ги қарорни (pdf) имзолади.
Ҳужжат Халқаро тараққиёт уюшмаси билан ҳамкорликни янада кенгайтириш, шунингдек уюшманинг устав капитали кўпайиши муносабати билан Ўзбекистон Республикасининг ундаги бошланғич улушини сақлаб қолиш мақсадида қабул қилинди.
Қарорда таъкидланишича, Халқаро тараққиёт уюшмаси (ХТУ) Бошқарувчилар кенгаши томонидан ХТУнинг устав капиталини кўпайтириш ва ХТУга аъзо мамлакатларнинг ХТУ устав капиталидаги улушларини сақлаб қолиш мақсадида қўшимча акцияларга обуна бўлишларини ташкил этиш тўғрисида қарор қабул қилинган.
Президент Ўзбекистон Республикаси Иқтисодиёт вазирлиги, Молия вазирлиги ва Марказий банкининг ХТУнинг устав капиталидаги 7972 та акцияга, шу жумладан номинал қиймати 25 АҚШ доллари бўлган жами 54,3 минг АҚШ доллари миқдоридаги 2172 та ҳақ тўланадиган акция ҳамда 5800 та ҳақ тўланмайдиган акцияларга обуна бўлиш тўғрисидаги таклифини маъқуллади.
Ўзбекистон Республикаси молия вазирига Ўзбекистон Республикасини ХТУнинг устав капиталидан қўшимча акциялар харид қилиш нияти борлиги тўғрисидаги ёзма мажбуриятни Ўзбекистон Республикаси номидан имзолаш ваколати берилди.
ХТУнинг устав капиталидаги 2172 та ҳақ тўланадиган акциялар учун тўлов Ўзбекистон Республикаси Марказий банки томонидан ХТУнинг Ўзбекистон Республикаси Марказий банкидаги ҳисобварағида жойлаштириладиган ҳамда ХТУнинг талабига биноан белгиланган тартибда сўндириладиган миллий валютада эквивалент қийматда бошқага ўтказилмайдиган вексель чиқариш йўли билан амалга оширилади.
Президент Ўзбекистон Республикаси Марказий банкига обуна бўлиш тўғрисидаги ҳужжат юборилгандан сўнг 31 кун мобайнида миллий валютада 54300 АҚШ долларига эквивалнт қийматдаги бошқага ўтказилмайдиган фоизсиз вексель чиқариб, уни ХТУнинг Ўзбекистон Ресоубликаси Марказий банкидаги қимматли қоғозлар ҳисобварағига жойлаштириш юкланди.
Изоҳ (0)