6-noyabr kuni Toshkentdagi Xalqaro Biznes markazida Savdo va sanoat bo‘yicha O‘zbekiston — Britaniya kengashining 21-yig‘ilishi o‘tkazildi. Bu haqda Buyuk Britaniyaning Toshkentdagi elchixonasi matbuot xizmati xabar bermoqda.
Britaniyaning O‘zbekistondagi elchisi Jorj Edgar Buyuk Britaniyaning 20 dan ziyod biznes soha vakillaridan iborat bo‘lgan delegatsiyasiga boshchilik qildi. O‘zbekiston Respublikasi tashqi iqtisodiy aloqalar, investitsiyalar va savdo vaziri, kengash hamraisi Elyor G‘aniyev O‘zbekiston delegatsiyasiga boshchilik qildi.
Taqdimnomalar doirasida tomonlar ikki davlatlarning investitsiya imkoniyatlari haqida gapirib berishdi. Anjuman davomida O‘zbekiston delegatsiyasi britaniyalik hamkasblarga O‘zbekiston iqtisodiyotining turli sohalarida, jumladan, neft-gaz, kimyo, konchilik, mashinasozlik, yengil sanoat, farmatsevtika va qurilish materiallari ishlab chiqarish sanoatlarida investitsiya imkoniyatlari haqida ma’lumotlar berishdi.
O‘zbekiston tomoni Britaniyalik hamkasblarga Navoiy va Angren erkin iqtisodiy zonalarida yuqori texnologiyali sarmoyaviy loyihalarni amalga oshirish uchun xorijiy investorlarga yaratilgan imkoniyatlar haqida ma’lumotlar berishdi. Shuningdek, tomonlar ta’lim, ilm-fan, turizm, chiqindilarni boshqarish, hamda tozalash va energiyani tejash texnologiyalari sohalarida aniq loyihalar bo‘yicha fikr almashishdi.
Savdo va sanoat bo‘yicha O‘zbekiston — Britaniya kengashi 1994-yilda tuzilgan. O‘BSSK Britaniyaning tashqi savdo masalalarida ko‘mak ko‘rsatuvchi hukumat tashkiloti bo‘lib, Savdo va investitsiyalar departamenti qoshida faoliyat yuritadi. O‘BSSK hukumat tomonidan moliyalashtirilib, O‘zbekistonda faoliyat yuritayotgan Britaniya kompaniyalariga hamda shu mamlakatda faoliyat yuritishga kirishmoqchi bo‘lgan biznesmenlarga ko‘mak berib keladi.
Izoh (0)