“O‘zbekenergo” davlat aksiyadorlik kompaniyasi 2015-yilning birinchi choragida Jahon bankining 60 million dollarlik mablag‘larini jalb etishni rejalashtirmoqda. U Qamchiq dovoni orqali o‘tadigan temir yo‘l liniyasi uchun elektr ta’minoti obyektlarini qurishga yo‘naltiriladi, deya xabar bermoqda “RIA Novosti” kompaniya vakiliga tayanib.
“O‘zbekenergo” vakilining aniqlik kiritishicha, mablag‘lar Jahon banki tarkibiga kiruvchi Xalqaro tiklanish va taraqqiyot banki manbalari hisobidan ajratiladi. Loyiha Angren—Pop elektrlashtirilgan temir yo‘li uchun 110/220 kV yuqori kuchlanishli liniyalar va podstansiyalar qurishni ko‘zda tutadi.
2013-yilning iyul oyida “O‘zbekiston temir yo‘llari” DAK Angren–Pop yo‘nalishi bo‘yicha yangi, uzunligi 129 kilometrlik elektrlashtirilgan temir yo‘li qurilishini boshlagan. Mazkur yo‘l Qamchiq dovoni orqali o‘tib, Farg‘ona vodiysini O‘zbekistonning qolgan hududlari bilan bog‘lashga xizmat qiladi.
Umumiy qiymati 1,769 milliard dollar bo‘lishi ko‘zlangan loyiha uchun bir milliard dollargacha xalqaro moliya institutlarining kredit mablag‘lari ishlatiladi; qolgan qismini esa O‘zbekiston tomoni moliyalashtiradi. Qurilish besh yil muddatda tugatilishi rejalashtirilgan.
Izoh (0)