Ispaniya chempionatining 9-turidan o‘rin olgan “Real” hamda “Barselona” klublari o‘rtasidagi uchrashuv yakunlandi. Unda Karlo Anchelotti shogirdlarining qo‘li baland keldi, deb xabar bermoqda Uff.uz.
Birinchi bo‘limning 4-daqiqasidayoq “Barselona” hisobda oldinga chiqib oldi. Neymar kataloniyaliklarning tezkor hujumini o‘z boshlab berib, Suaresning uzatmasidan so‘ng, uning o‘zi Karvaxal hamda Pepeni aldab o‘tib, ajoyib zarba bilan to‘pni Kasilyas qo‘riqlayotgan darvozaning qoq burchagiga joyladi — 0:1.
Shundan so‘ng, “Real” asta-sekinlik bilan tashabbusni o‘z tomoniga og‘dirib oldi va birin-ketin xavfli hujumlar uyushtira boshladi. Shularning biri 35-daqiqaga kelib naf keltirdi. Pike o‘z jarima maydonida to‘pni qo‘li bilan to‘xtatib qolgani uchun penalti bilan jazolandi. Uni esa Krishtianu Ronaldu bexato amalga oshirib, muvozanatni tikladi. Tanaffusga qadar durang natija saqlanib qoldi.
Ikkinchi bo‘limning 5-daqiqasida Pepe oshirilgan to‘pni boshi bilan Bravo darzasiga joyladi — 2:1. “Barselona” javob goli urish maqsadida hujumga berilib ketdi va bu uchun qattiq jazolandi. Oradan olti daqiqa o‘tgach, “Real”ning tezkor qarshi hujumini Karim Benzema ajoyib tarzda urilgan gol bilan yakunladi. Uchrashuv oxiriga qadar “Barselona” har qancha urinmasin vaziyatni o‘ngay olmadi.
“Real” mazkur g‘alaba evaziga 21 ochko to‘plab, musobaqa jadvalida 22 ochko bilan yetakchilik qilayotgan “Barselona”ga bir ochko farqigacha yaqinlashib oldi.
“Real Madrid” — “Barselona”: 3:1 (1:1, 2:0)
Gollar: 0:1 — 4 Neymar, 1:1 — 35, penalti Ronaldu, 2:1 — 50 Pepe, 3:1 — 61 Benzema.
“Real Madrid”: Kasilyas, Ramos, Karvaxal, Pepe, Marselo, Isko (Ilyarramendi, 84), Xames, Kroos, Modrich (Arbeloa, 89), Benzema (Xedira, 87), Ronaldu.
“Barselona”: Bravo, Dani Alves, Buskets, Pike, Matye, Xavi (Rakitich, 60), Maskerano, Inyesta (S.Roberto, 72), Neymar, Suares (Pedro, 69), Messi.
Ogohlantirishlar: Messi (9), Neymar (14), Pike (34), Inyesta (38), Karvaxal (74).
Izoh (0)