Janubiy Koreyada konsertdagi fojia tufayli 16 kishi halok bo‘lgach, amaldor o‘z joniga qasd qildi
Sonnam shahridagi konsert uchun javobgar bo‘lgan janubiy koreyalik amaldor 16 kishining hayotiga zomin bo‘lgan fojiadan ko‘p o‘tmay o‘z joniga qasd qildi. Bu haqda The Telegraph xabar bermoqda.
37 yoshli mansabdorning jasadi 18-oktabr, shanba kuni topilgan. Bundan bir necha soat avval uni tergovchilar so‘roq qilishgan. O‘limidan oldin amaldor o‘z rafiqasiga qisqa maktub qoldirgan: “Halok bo‘lganlar uchun afsusdaman. Iltimos, bolalarimga g‘amxo‘rlik qil”.
17-oktabr, juma kuni Osiyoda ommabop bo‘lgan 4 minute guruhi konserti davomida talabalar bo‘sh o‘rin topa olmasdan ventilyatsiya panjarasi ustiga chiqqan. Guvohlar so‘zlariga ko‘ra, yaqin orada ularga qarshilik ko‘rsatishi mumkin bo‘lgan mas’ul shaxslar bo‘lmagan. Tomoshabinlar panjara ustida kuylab raqs tushgan. Oxiri, u 25 kishini ko‘tara olmay, sinib ketgan. Tomoshabinlar 20 metrlik ventilyatsiya chuquriga tushib ketgan.
Natijada 12 kishi voqea joyida halok bo‘lgan, ikki kishi “tez yordam” mashinasida, yana ikki nafari shifoxonada vafot etgan. 11 kishi esa og‘ir jarohat olgan.
