Avval xabar berganimizdek, Bolalar mehnati masalalari bo‘yicha Muvofiqlashtiruvchi kengash ish rejasiga muvofiq O‘zbekistonda bolalar mehnati bo‘yicha milliy monitoring o‘tkazilmoqda. Joriy yilning 18-sentabridan 25-oktabrigacha davom etishi rejalashtirilgan mazkur monitoringni o‘tkazish maqsadida mamlakat kasaba uyushmalari rahbarligida 8 ta territorial ishchi guruhlari tuzilib, ularga Mehnat va aholini ijtimoiy muhofaza qilish vazirligi, Savdo-sanoat palatasi, Kasaba uyushmalarining xotin-qizlar Kengashlari, hududiy nodavlat tashkilotlar vakillari jalb etildi. Shuningdek, ushbu monitoringda Xalqaro mehnat tashkiloti ekspertlari faol ishtirok etmoqdalar va ular tomonidan texnik ko‘mak ko‘rsatilmoqda.
15-oktabr holatiga ko‘ra, territorial ishchi guruhlari ekspertlari tomonidan taxminan 30 ming kilometr masofa bosib o‘tilib, 124 ta qishloq tumanlariga tashrif buyurilgan. Shular davomida potensial xavf mavjud bo‘lgan joylarga 548 marta, jumladan kasb-hunar kollejlari va akademik litseylarga 247 marta, fermer xo‘jaliklariga 301 marta tashrif buyurilgan. Bu haqda O‘zbekiston Kasaba uyushmalari federatsiyasi portali xabar berdi.
Territorial monitoring guruhi ma’lumotlariga ko‘ra, akademik litsey va kasb-hunar kollejlarida o‘rtacha davomat ko‘rsatkichi 89 foizga teng.
Barcha ta’lim muassasalarida 18 yoshdan kichik bo‘lgan o‘quvchilarning paxta terimiga jalb qilinishi mumkin emasligi haqida e’lonlar osib qo‘yilgan.
Territorial monitoring guruhi tomonidan bolalarning paxta dalalarida ishlayotgani aniqlangan alohida holatlar bo‘yicha dalolatnomalar tuzildi va mehnat inspeksiyasi yordamida ma’muriy javobgarlik to‘g‘risida ish ochildi.
Jahon bankining O‘zbekistondagi vakolatxonasi rahbari vazifasini bajaruvchi N. Nakvi so‘zlariga ko‘ra, vakillar dalalarga tashrif buyurib, bolalar mehnatini ko‘rmadi. Ular barcha ishlar Xalqaro mehnat tashkiloti missiyasining 2013-yildagi hisobotida qayd etilgani kabi borayotganiga amin bo‘ldi. Tashrif buyurilgan barcha fermer xo‘jaliklari paxta teruvchilar bilan shartnoma tuzgan bo‘lib, ularning pasport nusxalariga ega. Eng yosh terimchi 19 yoshda ekani ma’lum bo‘ldi. Shu tariqa, Jahon banki vakillari maktab o‘quvchilarini tizimli ravishda paxta terimiga jalb etish bo‘yicha hech qanday dalillarni qo‘lga kiritmadi. Bu, ularning fikricha, XMTning o‘tgan yilgi hisobotiga to‘g‘ri keladi.
Izoh (0)