Microsoft kompaniyasi iOS, Android va Windows Phone operatsion tizimida ishlaydigan qurilmalar uchun yangi Xim — surat bo‘lishish dasturini ishga tushirdi. Bu haqda Phonearena.com ma’lumotiga asoslanib “Parol” nashri xabar berdi.
Faqatgina bitta surat yoki ayrim suratlarni boshqalarga ko‘rsatmoqchisiz, aynan o‘sha suratlardan boshqalarini ko‘rishlarini istamaysiz. Yoki bitta displeydan surat ko‘rish ko‘pchilik uchun noqulaylik qilmoqda. Shunday vaziyatlarda Xim dasturidan foydalansangiz bo‘ladi.
Xim dasturini smartfonga o‘rnatib, bo‘lishiladigan suratlarni belgilab, o‘zingiz istagan telefon kontaktlari, E-mail yoki telefon raqamlariga tanlangan suratlarni bo‘lishishingiz mumkin. Bunda jo‘natilgan surat siz tanlagan kishilarga matnli xabar ko‘rinishida yetib boradi va ular suratni internetda ko‘rish imkoniyatiga ega bo‘lishadi.
Shuningdek, jo‘natilgan suratlarga fikr bildirish ham mumkin. Agar siz jo‘natgan suratlarni qabul qiluvchilarda ham Microsoft Xim dasturi o‘rnatilgan bo‘lsa, u holda surat almashish yanada qiziqarliroq bo‘ladi. Suratlar ma’lum muddatdan so‘ng internetdan o‘chiriladi.
Microsoft Xim dasturi hozirda faqatgina Kanada va AQShda istiqomat qiluvchilar uchun foydalanishga topshirilgan. Yaqin orada esa boshqa davlatlarda ham ushbu dasturdan foydalanish imkoniyati yaratiladi.
Izoh (0)