O‘zbekiston Fanlar Akademiyasining Alisher Navoiy nomidagi Til va adabiyot instituti bir qator yangi lug‘atlarni nashrga tayyorlamoqda. Bu haqda “Turkiston-press” axborot agentligiga asoslanib, “Kun” xabar bermoqda.
Institut direktori, filologiya fanlari doktori, professor Nizomiddin Mahmudovning so‘zlariga ko‘ra, hozirgi vaqtda ilmiy muassasa o‘zbek tilining dolzarb muammolariga bag‘ishlangan ilmiy-nazariy va ilmiy-amaliy tadqiqotlar olib borilmoqda.
“Institutimiz xodimlarining katta bir guruhi o‘zbek tili leksikasi va terminologiyasining [mustaqillik yillaridagi] rivoji va takomili jarayonlaridagi qonuniyatlar va tamoyillar masalasini batafsil tadqiq etish bilan shug‘ullanmoqda, ana shunday fundamental tadqiqot loyihasi doirasida istiqlol sharofati bilan yanada boyigan ijtimoiy-siyosiy so‘zlar xazinasining izohli lug‘atini tuzish ustida ham ish olib bormoqdalar”, — dedi Nizomiddin Mahmudov.
Uning qo‘shimcha qilishicha, o‘zbek tili izohli lug‘atining lotin-o‘zbek alifbosidagi to‘ldirilgan varianti, joy nomlarining imlo lug‘ati, Alisher Navoiy asarlaridagi so‘zlar va iboralarning izohli lug‘atlari ustidagi ishlar ham “nihoyasiga yetay deb qolgan”.
“Institutimiz tilshunoslari tomonidan tayyorlangan kirill va lotin-o‘zbek alifbolaridagi imlo lug‘atlari, ikki jildli ruscha-o‘zbekcha lug‘at ham jamiyatimizdagi yozma til madaniyatining barqarorligiga, til o‘rganishni qulaylashtirishga xizmat qiladi, deb o‘ylayman”, — deya qo‘shimcha qildi institut direktori.
Izoh (0)