Ўзбекистон Фанлар Академиясининг Алишер Навоий номидаги Тил ва адабиёт институти бир қатор янги луғатларни нашрга тайёрламоқда. Бу ҳақда «Туркистон-пресс» ахборот агентлигига асосланиб, «Кун» хабар бермоқда.
Институт директори, филология фанлари доктори, профессор Низомиддин Маҳмудовнинг сўзларига кўра, ҳозирги вақтда илмий муассаса ўзбек тилининг долзарб муаммоларига бағишланган илмий-назарий ва илмий-амалий тадқиқотлар олиб борилмоқда.
«Институтимиз ходимларининг катта бир гуруҳи ўзбек тили лексикаси ва терминологиясининг [мустақиллик йилларидаги] ривожи ва такомили жараёнларидаги қонуниятлар ва тамойиллар масаласини батафсил тадқиқ этиш билан шуғулланмоқда, ана шундай фундаментал тадқиқот лойиҳаси доирасида истиқлол шарофати билан янада бойиган ижтимоий-сиёсий сўзлар хазинасининг изоҳли луғатини тузиш устида ҳам иш олиб бормоқдалар», — деди Низомиддин Маҳмудов.
Унинг қўшимча қилишича, ўзбек тили изоҳли луғатининг лотин-ўзбек алифбосидаги тўлдирилган варианти, жой номларининг имло луғати, Алишер Навоий асарларидаги сўзлар ва ибораларнинг изоҳли луғатлари устидаги ишлар ҳам «ниҳоясига етай деб қолган».
«Институтимиз тилшунослари томонидан тайёрланган кирилл ва лотин-ўзбек алифболаридаги имло луғатлари, икки жилдли русча-ўзбекча луғат ҳам жамиятимиздаги ёзма тил маданиятининг барқарорлигига, тил ўрганишни қулайлаштиришга хизмат қилади, деб ўйлайман», — дея қўшимча қилди институт директори.
Изоҳ (0)