Osiyo o‘yinlari guruh bosqichi, so‘nggi tur uchrashuvlari yakuniga yetdi. Unga ko‘ra, O‘zbekiston terma jamoasi Afg‘onistonga qarshi maydonga tushdi va yirik hisobda g‘alabaga erishdi. Bu haqda Uff.uz xabar bermoqda.
Hisob 6-daqiqadayoq ochildi. Yegor Krimets gol kiritib, jamoasini hisobda oldinga olib chiqdi. Shundan so‘ng ham bir necha bor gol urish uchun imkoniyatlar yuzaga keldi. Xususan, 31-daqiqada Vladimir Kozak chiroyli uslubda Vohid Shodiyevni darvozabon bilan birga-bir vaziyatga chiqarib yubordi. Ammo Vohid to‘pni darvozabon ustidan oshirib tashlashda xatoga yo‘l qo‘ydi va takroriy urinish bilan ham darvozani ishg‘ol qila olmadi.
Oradan biroz vaqt o‘tib, Vohid Shodiyev baribir o‘z maqsadiga yetdi. O‘zbekiston terma jamoasi burchakdan to‘pni o‘yinga kiritish imkoniyatiga ega bo‘ldi. Jamshid Iskanderov to‘pni chiroyli uslubda jarima maydonchasiga yetkazib berdi. To‘p shundoq ham darvozaga kirib ketadigandek tuyulgan bir vaqtda Vohid Shodiyev bosh bilan zarba berib, ikkinchi golni kiritishga muvaffaq bo‘ldi.
Ikkinchi bo‘limda Farrux Sayfiyev hisobni yirik ko‘rinishga keltirib qo‘ydi. Nihoyat 86-daqiqada Igor Sergeyev ham gol kiritishga muvaffaq bo‘ldi. Chap qanotdan Akbar Ismatullayev yetkazib bergan to‘pni Sergeyev darvozaga joyladi.
Uchrashuvning qo‘shimcha daqiqalari boshlangan vaqtda Vohid Shodiyev faqat bosh bilan emas, oyoq bilan ham gol ura olishini isbotladi. Yana chap qanotdan uyushtirilgan hujum natijasida to‘p rikoshet bo‘lib, Shodiyevning oyoqlari ostiga tushdi va tajribali hujumchi yakuniy zarba berishda adashmadi.
Shu tariqa, O‘zbekiston guruhda birinchi o‘rinni egallab oldi.
Guruhdagi boshqa bir uchrashuvda Gonkong terma jamoasi Bangladeshni 2:1 hisobida mag‘lub etdi va guruhda ikkinchi o‘rinni qo‘lga kiritdi.
Osiyo o‘yinlari, “B” guruhi (3-tur)
Afg‘oniston — O‘zbekiston: 0:5
Gollar: Yegor Krimets 6, Vohid Shodiyev 42, Farruh Sayfiyev 50, Igor Sergeyev 86, Vohid Shodiyev 90+1
Afg‘oniston: Muhammad Fardin, Faxriddin Horun, Farzod G‘ulom, Rahalloh Iqbolzoda, Mustafo Azatsoy, Kanishka Tohir, Feysal Shayiston, Sanjar Muhammad, Jaloliddin Sharityor, Amiriddin Muhammad, Muhammad Hoshimi
O‘zbekiston: Eldorbek Suyunov — Salim Mustafoyev, Islom To‘xtaxo‘jayev (Sherzod Fayziyev, 65), Yegor Krimets, Bobur Yo‘ldoshev — Sardor Rashidov (Farrux Sayfiyev, 47), Fozil Musayev (Akbar Ismatullayev, 48), Vladimir Kozak, Jamshid Iskandarov — Igor Sergeyev, Vohid Shodiyev.
Izoh (0)