O‘zbekistonda ishlab chiqariladigan yangi Aveo avtomobilining suratlari paydo bo‘ldi

Facebook’dagi “Voditeli Tashkenta” guruhi a’zolaridan biri Toshkentdagi yangi Aveo (T250) avtomobilining suratlari bilan bo‘lishdi.

Rasmdagi muhitdan xulosa qilish mumkinki, ushbu avtomobil poytaxtdagi Driver’s Village avtosaloniga keltirilgan. Suratlarda Aveo’ning tashqi ko‘rinishi bilan birgalikda, ichki qismi — saloni ham aks etgan.

Postga fikr bildirganlarning ko‘pchiligi yangi mashinaning ko‘rinishini o‘rtacha deb baholagan. Ba’zilar uni Cobalt bilan, boshqalar Spark bilan solishtirgan. Yana kimdir esa Aveo’ni Rossiyaning Lada avtomobiliga o‘xshatgan.

Ko‘pchilik foydalanuvchilar yangi modelning narxi bilan qiziqqan. Izoh yozganlarning ba’zilari uning arzon narxda chiqarilishini taxmin qilib, qiymati Cobalt va Lacetti’niki singari bo‘lishi mumkinligini ta’kidlagan.

Eslatib o‘tamiz, hukumat qarori bilan “O‘zavtosanoat” aksiyadorlik kompaniyasi vakillari General Motors Uzbekistan O‘zbekiston-Amerika qo‘shma korxonasida yangi T250 (Chevrolet Aveo) modelidagi avtomobillarni seriyali ishlab chiqarishni tashkil etish bo‘yicha loyihani amalga oshirishga kirishdi.

Hujjat “O‘zavtosanoat” AKga ikki oy muddatda loyihaning texnik-iqtisodiy asosini hukumatga tasdiqlash uchun taqdim etish vazifasini yuklaydi.