НАТО Россия билан муносабатларини тузатишга муваффақ бўла олмади. Бу ҳақда 15 сентябрь, душанба куни Альянс бош котиби Андерс Фог Расмуссен маълум қилди, деб ёзади «Сегодня».
«Биз узоқ вақт давомида Россия билан хавфсизлик масалалари, халқаро ҳуқуқ ва меъёрларга мувофиқ равишда шериклик алоқаларини қуришга астойдил ҳаракат қилдик», — деди у Брюсселдаги нутқида.
«Афсуски, Россия барча уринишларимизни рад қилди», — дея қўшимча қилди Расмуссен ўзининг Альянс бош котиблиги лавозимидаги ишларига якун чиқарар экан.
Шимолий Атлантика альянси бош котиби фикрича, Россия НАТОни шерикдан кўра кўпроқ душман сифатида қабул қилишда давом этмоқда.
Шу билан бирга, Расмуссен Альянсга кириш учун зарур ислоҳотларни қабул қилишга тайёр бўлган мамлакатлар учун НАТО эшиклари очиқ қолиши ҳақида айтиб ўтди.
Эслатиб ўтамиз, Расмуссеннинг Альянсга раҳбарлик муддати сентябрь охирида тугайди. 1 октябрдан НАТО бош котиби лавозимини Норвегия собиқ бош вазири Йенс Столтенберг эгаллайди.
Изоҳ (0)