Xitoyning Shinjon-Uyg‘ur avtonom tumanida mamlakatdagi bosh millat — xan millati vakillari bilan oila qurgan uyg‘urlarga 10 ming yuan (1,62 ming dollardan ko‘proq) miqdorida mablag‘ beriladi. Bu haqda mahalliy hukumat o‘zining rasmiy saytida e’lon qildi, deb xabar bermoqda Armenia Today nashri South China Morning Post’ga tayanib.
Nashrda qayd etilishicha, Xitoy hukumati ikki millat o‘rtasida nikohni qo‘llab-quvvatlash orqali Shinjon-Uyg‘ur avtonom tumanidagi ziddiyatlarni yo‘qotish va o‘zaro aloqalarni yaxshilashni maqsad qilgan.
Ma’lumotlarga ko‘ra, uyg‘urlar istiqomat qiladigan mazkur hudud uchun 10 ming yuan katta pul hisoblanadi. Negaki, tuman aholisining o‘rtacha yillik daromadi kishi boshiga 7,5 ming yuan (1,2 ming dollardan ko‘proq)ni tashkil etadi.
Turmush qurgan ikki millat vakillariga “o‘zaro uyg‘unlikda” hayot kechirgan har bir yil uchun ham 50 ming yuan (8000 dollardan ziyod) mablag‘ to‘lanadi. Ularning farzandlari esa maktabgacha ta’lim muassasalari va o‘rta maktabga bepul qatnash imkoniyatiga ega bo‘ladi. Shuningdek, ikki millat vakillarining farzandlari oliy ta’lim muassasalariga hujjat topshirganida, oila uchun 5000 yuan (814 dollar)ga teng grant ajratiladi. Biri xan, biri uyg‘ur millatiga mansub er-xotinga sog‘liqni saqlash uchun ham yordam puli ajratiladi.
Mazkur qonun avgust oyining boshida e’lon qilinganiga qaramay, hozirga qadar birorta ham xan-uyg‘ur nikohi qayd etilmadi. Nashrda ma’lum qilinishicha, hozirda xan-uyg‘ur oilalari soni jami 54 tani tashkil etmoqda. Bundan tashqari, mazkur ikki millat vakillarining o‘zaro nikohi ko‘p hollarda ajralish bilan tugamoqda.
Izoh (0)