AQShning Missuri shtati Fergyuson shahrida politsiyachilar tomonidan o‘ldirilgan o‘spirin jasadini yorib ko‘rish natijasida unga kamida olti marta o‘q uzilgani aniqlandi. Bu haqda CNN telekanaliga tayanib, “RIA Novosti” xabar berdi.
Xususiy patolog-anatom hisobotida aytilishicha, ikkita o‘q o‘smir yigitning boshiga kelib tekkan.
18-avgust, dushanbaga o‘tar kechasi Fergyuson shahrida ushbu voqea tufayli tartibsizliklar davom etgan. Vandalizm va do‘konlarning talon-taroj qilinish holatlari haqida xabarlar kelib tushgan. Politsiya namoyishchilarga qarshi yana ko‘zni yoshlantiruvchi gaz qo‘llamoqda. E’tirozchilar bilan to‘qnashuvlar davomida yosh bola yaralangan.
Eslatib o‘tamiz, 16-avgust kuni Fergyusonda Missuri shtati gubernatori Jey Nikson qarori bilan favqulodda holat e’lon qilindi va komendant soati (harbiy yoki qamal sharoitida ko‘chalarda ruxsatsiz yurish man qilingan soatlar) joriy etildi.
Ushbu chora-tadbirlar politsiyachilar tomonidan 18-yoshli qora tanli o‘spirin Maykl Braun o‘ldirilganidan so‘ng shaharda boshlanib ketgan va bir haftadan buyon davom etayotgan tartibsizliklar yuzasidan ko‘rilmoqda.
Politsiyachilar ta’kidlashicha, yigitcha mashinada bo‘lib o‘tgan jangda o‘q tegishi natijasida bir nechta jarohat olgan. Biroq guvohlar Braunning qurollanmagan bo‘lgani va qo‘llarini tepaga ko‘tarib turgan paytida otib tashlanganini aytmoqda. 14-avgust kuni AQSh prezidenti Barak Obama o‘spirinning o‘limi bo‘yicha tergov ishlari olib borish talabi bilan chiqdi.
Politsiya tomonidan qora tanli o‘smirning otib o‘ldirilishi mamlakatdagi 90 ta shaharda payshanba va juma kunlari e’tiroz namoyishlari o‘tkazilishiga olib keldi.
Izoh (0)