АҚШнинг Миссури штати Фергюсон шаҳрида полициячилар томонидан ўлдирилган ўспирин жасадини ёриб кўриш натижасида унга камида олти марта ўқ узилгани аниқланди. Бу ҳақда CNN телеканалига таяниб, «РИА Новости» хабар берди.

Хусусий патолог-анатом ҳисоботида айтилишича, иккита ўқ ўсмир йигитнинг бошига келиб теккан.

18 август, душанбага ўтар кечаси Фергюсон шаҳрида ушбу воқеа туфайли тартибсизликлар давом этган. Вандализм ва дўконларнинг талон-тарож қилиниш ҳолатлари ҳақида хабарлар келиб тушган. Полиция намойишчиларга қарши яна кўзни ёшлантирувчи газ қўлламоқда. Эътирозчилар билан тўқнашувлар давомида ёш бола яраланган.

Эслатиб ўтамиз, 16 август куни Фергюсонда Миссури штати губернатори Жей Никсон қарори билан фавқулодда ҳолат эълон қилинди ва комендант соати (ҳарбий ёки қамал шароитида кўчаларда рухсатсиз юриш ман қилинган соатлар) жорий этилди.

Ушбу чора-тадбирлар полициячилар томонидан 18-ёшли қора танли ўспирин Майкл Браун ўлдирилганидан сўнг шаҳарда бошланиб кетган ва бир ҳафтадан буён давом этаётган тартибсизликлар юзасидан кўрилмоқда.

Полициячилар таъкидлашича, йигитча машинада бўлиб ўтган жангда ўқ тегиши натижасида бир нечта жароҳат олган. Бироқ гувоҳлар Брауннинг қуролланмаган бўлгани ва қўлларини тепага кўтариб турган пайтида отиб ташланганини айтмоқда. 14 август куни АҚШ президенти Барак Обама ўспириннинг ўлими бўйича тергов ишлари олиб бориш талаби билан чиқди.

Полиция томонидан қора танли ўсмирнинг отиб ўлдирилиши мамлакатдаги 90 та шаҳарда пайшанба ва жума кунлари эътироз намойишлари ўтказилишига олиб келди.