Ertaga, 12-iyun kuni Braziliyada start oladigan futbol bo‘yicha jahon chempionati o‘zining rasmiy smartfoniga ega bo‘ldi. U musobaqaning eng yirik homiylaridan biri — Sony’ning yangi flagmani Xperia Z2’dir. Bu haqda Mail.ru xabar berdi.
Bundan tashqari, Yaponiya kompaniyasi JCh-2014’ga bag‘ishlab Sony Football Challenge maxsus tanlovini e’lon qildi. Uning ishtirokchilari musobaqaning barcha 64 ta o‘yini final hisoblarini topishi kerak bo‘ladi. G‘olibga Marokkoga VIP-sayohat imkoniyati hamda Xperia Z2 smartfoni, Xperia Z2 Tablet va PlayStation 4 taqdim etiladi. Yuqori o‘ntalikka kirganlar esa bittadan Xperia Z2 smartfonidan iborat sovrinni qo‘lga kiritadi.
Eslatib o‘tamiz, Sony Xperia Z2 gadjetiga to‘rtta Krait yadroli yangi Qualcomm Snapdragon 801 protsessori o‘rnatilgan, u 2,3 GGs chastotada ishlaydi. Smartfon 4G LTE moduliga, 3 GB tezkor xotiraga va katta hajmli (3200 mA/s) akkumulyatorga ega. Uning suv o‘tkazmas korpusi (IP58) atigi 8,2 mm qalinlikka ega.
Xperia Z2 smartfoniga Full HD sifatli va 5,2 dyuym diagonalli TRILUMINOS displeyi o‘rnatilgan. Mazkur displey LED Live Colour va X-Reality texnologiyalari asosida mobil qurilmalar uchun maxsus ishlab chiqilgan. Smartfoni 16 GB hajmli ichki xotiraga ega, unga yana microSD kartochkalarini o‘rnatish mumkin.
Izoh (0)