AQShlik ayol 99 yoshida kollejni bitirdi
AQShning Men shtatida yashovchi 99 yoshli ayol kollejni bitirganidan 75 yil o‘tgach, o‘z diplomini olishga muvaffaq bo‘ldi. Bu haqda Associated Press xabar berdi.
Diplomni bunday kech qo‘lga kiritishiga Jessi Uayt ismli ayolning 1939-yilda besh dollarlik bojni to‘lamagani sabab bo‘ldi.
U Bangor shahridagi Bil kollejida bo‘lib o‘tgan diplom topshirish marosimida qatnashdi. Keksa bitiruvchi stenografiya va hisobchilik sohasida darajaga ega bo‘ldi.
Uayt xonim poliomiyelit kasalligiga chalingan, shunga qaramay u uzoq yillar hisobchi bo‘lib ishlagan. Uning muammosidan xabar topgan do‘sti bojni to‘lab, Jessini marosimga olib borgan.
O‘zining aytishicha, diplom olgach, u xursandligidan hayajonlanib ketgan. “Hech qachon o‘qishdan to‘xtamang. Aytishlaricha, o‘qishdan to‘xtasangiz, qarib qolasiz. Shuning uchun men o‘qishni tugatmoqchi emasman”, — dedi u.
