Haqoratli izohlar tufayli Rim papasi Facebook’dagi sahifasidan voz kechadi

Rim papasi Fransisk Facebook’da sahifa ochmaydigan bo‘ldi. Bunga kardinal (Rim papasidan keyingi eng yuqori unvondagi ruhoniy)larning xavotiri sabab bo‘ldi. Ular papaga ko‘plab haqoratlar kelib tushishini taxmin qilmoqda. Bu haqda The Independent xabar berdi.

“Rim papasining Twitter’idagi haqoratli izohlarni sezmaslik mumkin, biroq Facebook’da ularni bekitib bo‘lmaydi”, — dedi Papa kengashining ijtimoiy kommunikatsiyalar bo‘yicha raisi arxiyepiskop Klaudio Mariya Chelli.

U rasmiy yangiliklar sayti News.va’ning Facebook’dagi sahifasini “tozalash”ga Vatikan shundoq ham ko‘p vaqt sarflagani, endi pontifikning shaxsiy sahifasida ham bu ish bilan shug‘ullanishdan ma’ni yo‘qligini ta’kidladi.