O‘zbekistonlik abonentlar telefoniga spam SMS-xabar kelayotgani haqida ma’lum qilingan edi. Smartfoniga shunday SMS kelgan va link orqali kirib, virus dasturni o‘rnatib olgan abonentlar uchun yuqtirilgan virusni tozalash qo‘llanmasi ishlab chiqildi. Hamza Foziljonovning xabar berishicha, Beeline ushbu SMS-spam bilan zararlangan Android qurilmalarni virusdan tozalash yo‘riqnomasini abonentlarga ma’lum qilgan.
1. Android qurilmada agar antivirus dasturi bo‘lmasa (ba’zi holatlarda bunday dastur bo‘lsa ham), virusli fayl qurilma xotirasidagi Download (Yuklab olinganlar) jildiga tushadi. Xususan, Samsung smartfonlarida ushbu jild quyidagi manzilda joylashgan:
МЕНЮ — МОИ ФАЙЛЫ — ВСЕ ФАЙЛЫ — DEVICE STORAGE — DOWNLOAD
2. Ushbu jilddan FOTO_ALBOM.apk deb nomlangan faylni o‘chirib tashlash lozim.
3. Smartfonga virus o‘rnashganmi yoki yo‘qmi tekshirish uchun НАСТРОЙКИ-ОПЦИИ-ДИСПЕТЧЕР ПРИЛОЖЕНИЙ menyusiga kirib, u yerdagi ЗАГРУЖЕНО bo‘limini tekshirib chiqish kerak.
Agar u yerda hajmi 200 KB atrofidagi Google Play deb nomlangan dastur mavjud bo‘lsa, demak smartfon ushbu virus bilan zararlangan.
Diqqat! Google Play Маркет deb nomlangan hamda hajmi 10,5 MB atrofida bo‘lgan dastur haqiqiydir, u virus emas!
4. Yuqorida tilga olingan, hajmi 204 kilobaytlik soxta Google Play dasturini o‘chirib tashlash kerak.
5. Shu bilan smartfon ushbu virusdan tozalanadi va kontaktdagi telefon raqamlarga abonent nomidan SMS-spam borishi to‘xtaydi.