Messi “Barselona”dan 4 yilda 400 mln yevro to‘lashni talab qilmoqda

Lionel Messi “Barselona” bilan yangi shartnoma imzolashga rozi, ammo tomonlar futbolchining maoshi borasida bir qarorga kela olmayapti. Bu haqda Uff.uz xabar berdi.

Kataloniyaliklar futbolchining otasi boshqaradigan Messi Management kompaniyasiga besh yillik shartnoma va 200 million yevro maosh taklif qilmoqchi. Yiliga 40 million yevro maosh berilishi ko‘zda tutilgan bu shartnomaga ko‘ra, klub Messining reklamadan topadigan daromadining 20 foiziga egalik qilishi lozim bo‘ladi.

Messining vakillari esa o‘z navbatida “Barselona” bilan 4 yillik shartnoma imzolab, 400 million yevro berishlarini talab qilmoqda. Shu bilan birga klub futbolchining reklamadan topadigan puliga umuman da’vogarlik qilmasligi lozim.

Euromericas Sport Marketing tomonidan berilgan bahoga ko‘ra, Messining ayni vaqtdagi qiymati 492 million yevroni tashkil qiladi. Eslatib o‘tamiz, ayni vaqtda Messi dunyoning eng ko‘p daromad qiladigan 10 sportchisi sirasiga kiradi va yiliga 41,3 million dollar ishlab topadi. Bu mablag‘ning 20,3 million dollari “Barselona”dan oladigan maoshi bo‘lsa, 21 million dollar reklamadan tushadi.