Toshkentda jismoniy imkoniyati cheklangan yoshlar suzish bo‘yicha musobaqalashishdi

Toshkentda jismoniy imkoniyati cheklangan yoshlar o‘rtasida suzish bo‘yicha O‘zbekiston chempionati o‘tkazildi. O’zbekiston Milliy paralimpiya assotsiatsiyasi matbuot xizmati xabariga ko‘ra, 2014-yilgi musobaqada 80 nafardan ziyod o‘smir-qizlar g‘oliblik uchun bahs yuritdi, — deb yozadi “Kun”.

O’g‘il bolalar o‘rtasida bo‘lib o‘tgan musobaqalarda toshkentlik Umid Abduhalilov 50, 100 va 200 metr masofaga erkin usulda suzishda bir yo‘la uchta oltin medalni qo‘lga kiritdi. Umid 100 metrga chalqancha suzish usulda suzishda kumush medal sovrindori bo‘ldi.

Toshkent shahri jamoasi a’zolari, shuningdek, 100 metr masofaga chalqancha hamda 200 metr masofaga erkin va brass usulida suzish bahslarida ham birinchi o‘rinni egallashdi.

Yuriy Tereshin 200 metrga erkin va brass usulda suzish bahsida ikkita oltin medalga sazovor bo‘lgan bo‘lsa, 100 metrga chalqancha suzishda Sardor Xoliqov marra chizig‘iga birinchi bo‘lib yetib keldi. 100 metr masofaga erkin va chalqancha suzishda qashqadaryolik Farrux Rajabov chempionlikni qo‘lga kiritdi.

“Qizlar o‘rtasida bo‘lib o‘tgan musobaqalarda Toshkent shahri vakillari O’zbekiston chempioni nomiga sazovor bo‘lishdi. 200 metrga erkin, 100 metrga chalqancha va brass usulida suzish musobaqalarida Yekaterina Yudinok uch bor shoxsupaning eng yuqori pog‘onasiga ko‘tarilgan bo‘lsa, 50 metrga erkin usulda suzishda Albina Hidoyatova oltin medal sohibi bo‘ldi”, – deyiladi xabarda.